Diskursu Pezidente Repúblika, Francisco Guterres ‘Lú Olo, iha ámbitu lansamentu livru ’Buibere Hamriik Ukun Rasik-an’, iha Palásiu Prezidensiál, Bairro Pité, kinta (10/06). Imajen TATOLI/Francisco Sony

DILI, 10 juñu 2021 (TATOLI)Prezidente Repúblika (PR), Francisco Guterres ‘Lú Olo’, iha kinta ne’e, halo lansamentu ba livru ho títulu ‘Buibere Hambrik Ukun Rasik-an’ no iha biban ne’e, komemora loron levantamentu Marabia, inklui kondekora Ordem Timor-Leste ba Saudoza Merita Alves ‘Bi-Kiak’.

“Ho laran ksolok tebes no orgullu boot, ha’u lansa obra importante ida, la’ós de’it ba ita-nia feto aswa’in sira, maibé ba mós ita hotu, jerasaun ohin nno abanbairua nian. Livru ne’e sura istória luta barani feto sira-nian, lansa iha Palásiu Prezidensial Nicolau Lobato no asosia ho loron importante tebes ida, iha ita-nia Luta Libertasaun Nasionál, hanesan levantamentu Marabia iha 10 juñu 1980,” Prezidente Repúblika, hateten liuhosi diskursu, iha Palásiu Prezidensiál, Aitarak-laran, Dili.

Tuir Xefe Estadu, hosi istória mak bele hasai lisaun oioin ba moris ohin loron no ba abanbairua, tanba istória sura iha livru ‘Buibere Hamriik Ukun Rasik-an’ haree ba pasadu ida ne’ebé nakonu ho barani, determinasaun no dedikasaun, maibé ho mós halerik oioin ne’ebé sei hakanek hela sobrevivente sira.

Livru ne’e, mai hosi inisiativa Organizasaun Popular da Mulher Timor (OPMT), nu’udar organizasaun masa FRETILIN nian, maibé reflekte feto hotu ninia kontribuisaun ba luta, hosi tinan 1974 to’o 1999.

Pezidente Repúblika, Francisco Guterres ‘Lú Olo’, vizita fatin fa’an livru ‘Buibere Hamriik Ukun Rasik-an’, iha Palásiu Prezidensiál, Bairro Pité, kinta (10/06). Imajen TATOLI/Francisco Sony

Ho kontestu koletivu ne’e mak líder istóriku hotu fó apoiu totál no inkondisionál, hahú ho festa angariasaun fundu iha tinan 2010 no hetan mós apoiu finanseiru husi Gabinete Primeiru-Ministru, organizasaun oioin, maluk timor-oan no belun barak tebes, inklui emprezáriu sira hodi hatán ho apoiu di’ak ba inisiativa ida ne’e.

“Ho haksolok boot, ha’u haree katak ekipa hotu ne’ebé harii hodi halo produsaun ba livru ne’e, kahor feto mane, jerasaun tuan ho jerasaun foin-sa’ee,” nia akresenta.

Xefe Estadu dehan, dalan ida permite fahe esperiénsia no tau hamutuk matenek idaidak nian, hasi jerasaun oioin no konsege duni prodús obra koletiva ne’ebé sura no interpreta istória Luta Libertasaun Nasionál, ho perspetiva timor-oan sira-nian, ho apoiu hosi lbelun boot tolu, ho fuan Timór hanesan, Nugroho, Titi no Kelly Silva.

Obra ne’e foin fó-sai ba dahuluk no klean tebes, kona-ba saida loos mak feto timor-oan sira halo ho barani, nu’udar indivíduu ka liuhosi organizasaun polítiku partidária ka lae, hosi tinan 1974 to’o 1999, iha rai-laran no iha rai-li’ur.                                                                                          

Xefe Estadu konta tuir, buibere sira hatene duni foti inisiativa, organiza-an ho espíritu kreativu no matenek rasik, hatene oinsá lidera knaar oioin ne’ebé dala barak envolve mós mane sira, tuir kbiit ho meiu sira ne’ebé iha hodi partisipa iha prosesu luta libertasaun Pátria.

Nune’e,  obra ne’e reflekte importánsia papél feto iha prosesu tomak luta, iha Frente Armada, Klandestina no Esterna.

Líder istóriku lima asosia-an iha livru

Líder istóriku na’in-lima asosia-an mós ho livru ne’e tanba sai autor ba prefásiu, nune’e líder sira mós rekoñese no valoriza feto timoroan sira nu’udar parseiru luta-na’in.

Pezidente Repúblika, Francisco Guterres ‘Lú Olo’, hamutuk ho Espoza, Cidália Lopes Nobre Mouzinho, foto hamutuk ho Líder Istóriku iha livru ‘Buibere Hamriik Ukun Rasik-an, iha Palásiu Prezidensiál, Bairro Pité, kinta (10/06). Imajen TATOLI/Francisco Sony

Aleinde Prezidente Repúblika, prefásiu hakerek mós  hosi  líder istóriku haat hanesan, Xanana Gusmão, José Ramos Horta, Taur Matan Ruak no Mari Alkatiri.

Livru ‘Buibere Hamriik Ukun Rasik-an’ iha dimensaun nasionál, ho valór sosiál, polítiku, istóriku no edukasionál a’as tebes ba jerasaun hotu.

“Bainhira ita valoriza feto timor-ona nu’udar parseiru luta-na’in, ita hasa’e mós fiar metin ba sira-nia potensialidades atu kontinua luta hamutuk ho ita ba Libertasaun Povu, ne’ebé hakarak ka lakoi, ohin loron populasaun feto Timor-Leste kuaze metade populasaun ita-nian,” PR tenik.

Tuir Xefe Estadu, feto sira sai forsa boot ida ne’ébé mane labele hasees, tanba ho de’it feto nia partisipasaun tomak mak mane bele hetan susesu iha prosesu dezenvolvimentu atu hamenus kiak iha rai-laran.

Feto nu’udár rin forte

Prezidente Repúblika konsidera, presiza haree feto sira nu’udar inan no riin forte ne’ebé fó balansu ba ida-idak no tanen família atu sai forte no saudável ba beibeik, tanba inan ida hatene hakiak no fahe domin, hatene hametin laran hakmatek no responsabilidade ba oan, ho nune’e bele sustenta páz no estabilidade iha Rai doben.

Nune’e, Xefe Estadu iha esperansa livru ne’e sei loke hotu neon atu hasa’e a’as feto sira iha aspetu hotu, tanba prova ona katak sira mós hala’o knaar susesu iha frente luta hotu.

“Ha’u hein katak livru ne’e sei hetan espasu espesiál iha biblioteka nasionál, Arkivu Nasionál, Muzeu Rezisténsia, Konsellu Kombatente Libertasaun Nasionál, CHEGA no biblioteka instituisaun públika sira-nian inkluo sei tama mós nu’udar materiál estudu iha eskola hotu no Universidade sira,” nia hatutan.

PR rekoñese, bainhira kuda interese nafatin atu haree ba pasadu, nu’udar fonte inspirasaun ba ohin loron no aban bain-rua atu hametin ba bebeik orgullu pertense ba Rai doben, ho Povu ida ne’ebé iha identidade no istória ho karaterístika rasik no úniku.

“Nu’udar atu rekoñesimentu no valorizasaun ba esforsu halibur testemuñu 800 resin iha Timor-Leste tomak, maka konsege prodús obra koletiva ida,  Prezidente Repúblika deside fó sertifikadu louvor koletivu ida ba Comissão de Pesquisa e Elaboração da História da Luta da Mulher Timor,” nia subliña.

Xede Estadu kondekora Saudoza Bi-Kiak ho Ordem Timor-Leste

Prezidente Repúblika tau as obra koletiva ‘Buibere Hamriik Ukun Rasik-an’, maibé iha prosesu peskiza, hakerek no prodús obra koletiva ida ne’e, iha maluk balun mak dada dalan, organiza, koordena, inspira no kaer metin mehi koletivu ne’e to’o nakfila ba realidade, hanesan Buibere Merita Alves ‘Bi-Kiak’, ne’ebé hakotu iis iha loron 24 maiu liubá.

Bainhira moras hela, Saudoza ne’e sempre preokupa ho lansamentu livru ida ne’e nu’udar dalan ida atu haklaken no lori sosiedade tomak atu rekoñese no valoriza feto.

Bi-Kiak nu’udár ezemplu ein termu dedikasaun, barani, espíritu sakrifísiu no determinasaun iha  períodu tomak luta libertasaun nasionál no mós iha tempu ukun-an, atu hatuur jutisa sosiál.

Tanba ne’e, Prezidente Repúblika deside fó onra, títulu póstumu, ba Buibere Merita Alves ‘Bi-Kiak’ ho kondekorasaun Ordem Timor-Leste, grau Kolár, títulu póstumu.

Prezidente Repúblika konsidera, grau ne’e a’as liu grau seluk ne’ebé antes ne’e Xefe Estadu fó ona ba entidade ka individualidade, tuir  Dekretu-Lei númeru 20/2009, loron 06 maiu, Ordem de Timor-Leste.

Ho kondekorasaun espesiál ne’e, Prezidente Repúblika, ho Estadu Timor-Leste nia naran,  hasa’e a’as memória eroína ida ne’ebé husik hela lejadu boot ba nasaun.

Loron ba lansamentu livru importante ne’e no kondekorasaun ba Saudoza Buibere Merita Alves akontese hotu iha loron istórika importante ida ba ita-nia luta libertasaun nasionál.

Hafoin Bases de Apoio rahun iha tinan 1979, inimigu hanoin katak Rezisténsia mate tiha ona no fó sai ba mundu katak Povu Timur-Timur (iha okupasaun Indonézia) hili tiha ona dalan integrasaun no pembangunan ho Indonézia.

Maibé, membru sobrevivente FALINTIL sira, ne’ebé organiza-an filafali iha arredór no Dili laran, konsege duni fó sinál oin seluk ba mundu ho levantamentu iha Marabia,  iha loron 10 juñu 1980, ho forsa kiik ida, ema atus ho kilat neen nulu resin, FALINTIL ho apoiu populasaun nian,  halo asaltu ba fatin sira ne’ebé tropa indonéziu hela, hanesan Marabia, Dare, Fatunaba no  Becora.

Objetivu atake ne’e mak hatudu ba mundu katak FRETILIN sei eziste iha Timor-Leste no Funu ba Ukun Rasik-an sei kontinua.

Hetan duni objetivu ida ne’e, maibé inimigu kaer no lori lakon to’o ohin loron timor-oan 120.000, barak mak hetan dadur inklui desterru ba Ataúro no balun tenke hatán ba interrogatóriu beibeik.

Partisipa iha serimónia ne’e, eis-prizioneira ida, Buibere Catarina de Araújo, ne’ebé ohin loron kaer kargu nu’udar Vise-Presidente Comição 10 de Junho de 1980, Marabia.

Livru ‘Hamriik Ukun Rasik-an’ hatudu prova barak katak ho feto sira-nia kontribuisaun mak Timor-Leste konsege hetan Ukun rasik-an. Feto sira mós sai eróina iha tempu luta ba Ukun Rasik-an.

Tanba ne’e, Konstituisaun hatuur mós direitu hanesan entre feto no mane no hatuur polítika edukasaun ba ema hotu, dalan nakloke liután ona ba feto sira atu partisipa iha prosesu dezenvolvimentu nasional.

“Biar dalan nakloke daudaun, ita hotu hatene katak feto barak tebes mak moris ho tauk no halerik subar hela iha uma. Situasaun sira ne’e akontese  tanba ema barak sei kaer metin tradisaun negativu ne’ebé hanehan feto maka’as. Feto barak hasoru hela violénsia doméstika no abuzu seksual ho forma oinoin, inklui labarik-feto sira,” Prezidente Repúblika nota.

Hakotu abuzu uma laran

Tanba ne’e, nia konsidera, atu lori país ba oin ho susesu, tenke hakotu hodi biit no lalais abuzu sira iha uma laran ka ha fatin ne’ebé de’ it, ho razaun ne’ebé de’it.

Prezidente Repúblika fiar katak liuhosi edukasaun ho valór hanesan domin, respeitu no  espíritu solidariedade entre ema, hahú hosi otas kiik kedas, mak bele hadi’a sosiedade ninia komportamentu ba aban bain-rua.

“Ba jerasaun ohin loron nian, ha’u aproveita oportunidade ida ne’e hodi apela ba família no sosiedade tomak no entidade hotu, atu hadomi no respeita liután ita-nia feto sira, tanba sira mak ai-rin metin ba família no ba sosiedade.

Husu boot ba Parlamentu Nasionál, Governu, Polísia Nasuonál Timor-Leste (PNTL),  Prokuradoria-Jerál Repúblika no Tribunál sira atu hamutuk  proteje vítima sira, inklui labarik feto sira, no  hatuur justisa loloos ba sira ne’ebé komete krime,” Xefe Estadu apela.

Tanba hasa’e ohin memória eroína no erói sira-nian asosiadu ho levantamentu Marabia, Prezidente Repúblika husu ba entidade hotu atu  buka dalan atu nakfilak sira-nia mehi ba realidade. Sira luta ba liberta Povu, inkui mós ita-nia feto sira iha Timor-Leste tomak.

Tanba liu dalan ne’e mak mehi boot mós husik hela hosi Saudoza Merita Alves ‘Bi-Kiak’,

“Ho apoiu hosi entidade hotu, liuliu Governu,  liuhusi Konsellu Kombatente Libertasaun Nasionál, Muzeu Rezisténsia Sentru Chega, Prezidente Repúblika hein katak Comissão de Pesquisa e Elaboração da História da  Luta da Mulher Timor sei hakaat ho susesu  ba publikasaun  faze daruak, Kombatente feto ida,  istória ida, Nune’e, nune’e halo Povu Timor-Leste nia istória rasik,” PR dehan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here