Primeiru-Ministru, Taur Matan Ruak. Imajen TATOLI/Egas Cristóvão

DILI, 10 juñu 2021 (TATOLI)-Primeiru-Ministru (PM) no Ministru Interiór, Taur Matan Ruak, apela ba membru Polísia Nasionál Timor-Leste (PNTL) atu kontrola emosaun bainhira uza arma (pistola no kilat).

“Tenke kontrolu oinsá mak lori kilat, labele ho emosaun. Tanba ita kuandu kaer kilat ka tudik ne’e tenke kaer ho kuidadu, ita kaer sasán sira ne’e tenke konfia uluk ita-nia an tanba kaer kilat ne’e di’ak maibé lori mós a’at ba ita,”PM informa hafoin reuniaun semanál ho Xefe Estadu iha Palásiu Prezidénsial, Bairro Pité, kinta ne’e.

Notísia relevante: Kazu Lahane, Komandu PNTL halo ona asaun prosedimentu dixiplinár no kriminál

Tuir Xefe Governu, ema ne’ebé sai ona Polísia no Forsa Armada, tenke kontrola-an no emosaun ne’e forte.

“Labele kiik boot hanesan cowboy ne’e ladi’ak, entaun presiza treina di’ak liután,” PM fó hanoin.

Maski nune’e, Xefe Ezekutivu deklara, la tolera ba aktu krime hotu ne’ebé komete hosi membru Polísia.

Nune’e mós, PM Apela ba PNTL atu kontinua servisu nafatin no tenke hakribi ba aktu violénsia, ne’ebé daudaun orienta ona Komandu atu kontrola membru sira utiliza arma.

Biban ne’e, Ministru Interiór apela mós ba públiku katak labele fó sala ba ema hotu (PNTL) tanba ema ida ninia aktu.

Notísia relevante: Komandu husu públiku tau fiar nafatin ba PNTL

“Ha’u hakarak apela ba komunidade tomak katak, ema ida mak sala ne’e, ema ne’e mak sala, ita labele dehan ema hotu mak sala. Ezemplu, família ida iha ema ida halo sala, entaun nia de’it mak sala, la’ós família tomak nia sala, PNTL mós hanesan tanba ne’e mak mantein respeitu no kooperasaun ho instituisaun seguransa ne’e,” PM apela.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here