Imajen/Espesiál.

DILI, 10 juñu 2021 (TATOLI)—“Se hakarak Autoridade Munisipál (PEMDA=Pemerintah Daerah) sai asinante ba Suara Timor Timur (STT) no hakarak ita dame malu, STT tenke ezonera jornalista na’in-rua Metha Guterres no Adérito Hugo da Costa. Sira na’in-rua hakarak sai jornalista idealista, defísil tebes iha Timor Timur ne’e,” Governadór Timor-Timur, Abilio Soares.

Sitasaun ida iha leten ne’e, hanesan reflesaun no lia-loos ida kona-ba matebian Metha Guterres ninia sasin-moris, bainhira nia hala’o knaar nu’udar jornalista iha situasaun defísil nia laran. Sitasaun ne’e, hakarak atu husik hela lia-tatoli ba maluk jornalista sira seluk katak, jornalista Metha Guterres bainhira hala’o knaar nu’udar jornalista iha STT, hanesan jornalista timor-oan ne’ebé idealista la’ós jornalista “STT” ka “Suka Tambah Tambah”.

Matebian Metha Guterres. Imajen/Espesiál.

Razaun, entre tinan 1997-1998, Metha Guterres ho nia kolega jornalista seluk (Adérito Hugo da Costa no João Barreto) sai militár Indonézia nia inimigu boot. La’os tanba kontra militár ka kontra Governu Indonézia, maibé tanba sira hanesan jornalista ida-ne’ebé krítiku hodi hakerek notísia kona-ba violasaun direitu umanu, hamlaha, torturasaun, no kazu koluzaun Governadór Abílio Soares ho família Soeharto (Cendana) ne’ebé mídia internasionál sira sita (tanba sira mós korespondente ba mídia internasionál).

Tanba de’it notísia hirak ne’e, matebian Metha Guterres sai militár Indonézia no Governu Indonézia ninia inimigu boot iha biban ne’ebá. Liuhosi telefone ilegál, ema deskuñesidu tarata jornalista STT hosi rohan ba rohan. Iha biban ida, Governadór Timor Timur, Abílio Osório Soares, bolu no fó atensaun ba jerente Suara Timor Timur (STT), Domingos Saldanha, no Governadór hateten tenke ezonera lalais jornalista Metha Guterres no Adérito Hugo da Costa hosi STT, tanba jornalista na’in-rua ne’e la koopera ho Governu.

“Se hakarak Autoridade Munisípál (PEMDA=Pemerintah Daerah) sai asinante ba Suara Timor Timur (STT) no hakarak ita dame malu, STT tenke ezonera jornalista na’in-rua Metha Guterres no Adérito Hugo da Costa. Sira na’in-rua hakarak sai jornalista idealista, maibé defísil tebes iha Timor-Timur ne’e,” Governadór Timor-Timur, Abílio Osório Soares hateten.

Maibé, iha Governadór Timor Timur nia oin, jerente STT Domingos Saldanha hamriik firme hodi rejeita no hatán ho brani hodi hateten; “Suara Timor Timur sei presiza jornalista na’in-rua (Metha Guterres no Adérito Hugo da Costa) ne’e”.

Tanba de’it matebian Metha Guterres no Adérito Hugo da Costa (atuál deputadu iha Parlamentu Nasionál) nia hahalok no hanoin katak STT laiha ona vontade atu servisu hamutuk Autoridade Munisipál (PEMDA), Abílio Osório Soares ho apoiu hosi Jenerál Wiranto harii jornál diáriu ida hanaran ‘NOVAS”.

Jornál ne’e harii ho intensaun no alvu prinsipál mak atu hamate jornál Suara Timor Timur (STT). Maibé, mehi ne’e sai saugate de’it tanba hosi loron ba loron STT hahú hetan fatin iha komunidade inklui Forsa Armada Libertasaun Nasionál Timor-Leste (FALINTIL) nia fuan laran.

Matebian Metha Guterres. Imajen/Espesiál.

Bainhira Indonézia hetan no hasoru krize moneter ne’ebé afeta ba jornál boot sira poupa no hamenus pájina no eksemplar, STT hetok buras tanba hosi eksemplar 1.800 sa’e ba eksemplar 3.800. Iha fulan-novembru no dezembru 1989, STT hasa’e eksemplar to’o iha level 4.800, Iha tinan 1999, STT hasa’e nia eksemplar to’o 5.000, iha fulan fevereiru-marsu ne’e eksemplar sa’e ba 6.000. Bainhira akontese estragu iha edifísiu STT nian, STT atinje ona nia eksemplar to’o 8000.

Iha 17 agostu 1998, STT halo reflesaun ba sira-nia an no halo mudansa ba sira-nia karater ne’ebé públiku kuñese “besik” ho burokrásia ne’ebé besik liu ba povu. Lema ne’ebé hosi hahú sira hahí hanesan “Lian Unidade no Dezenvolvimentu” muda hikas ba “Lian Justisa no Lia-Loos”. Lema ne’e dalaruma suli hamutuk ho Amo Bispu Don Carlos Filipe Ximenes Belo, SDB, ne’ebé haktuir iha livru aniversáriu STT dahuluk nian.

Jornalista Metha Guterres, nu’udar timor-oan ida, nia iha espíritu nasionalizmu no patriotizmu ne’ebé forte no metin hanesan bandeira riin besi axu. Nune’e ka la nune’e, jornalista Metha Guterres merese duni tau kaibauk iha nia reen-toos bá, katak Metha Guterres mak jornalista idealista no la’ós jornalista “Suka Tambah Tambah” ka “STT” ne’ebé (iha biban ne’ebá) ema balun tula iha jornalista sira-ne’ebé haknaar an iha Suara Timor Timur (STT) nia kbaas leten.

Ida-ne’e la’ós natoon ko’alia sai de’it ho liafuan maibé iha prátika liuliu iha sira-nia atividade jornalizmu loro-loron, membru milísia Besi Merah Putih (BMP) ne’ebé lidera hosi João Tavares, sempre buka tuir jornalista Metha Guterres atu dudu sees tiha ba fatin kloot.

Prova, iha 11 abríl 1999, bainhira Amo Belo vizita Liquiça atu halo misa requiem ba timor-oan sira-ne’ebé mate iha masakre Igreja Liquiçá ne’ebé oho hosi membru milísia BMP no miltár indonéziu balun, STT delega jornalista Metha Guterres, Lourenço Martins no Suzana Cardoso, hamutuk ho jornalista na’in-20 seluk sa’e karreta alugadu ida.

Bainhira Amo Belo hato’o hela nia omília, grupu milisia Besi Merah Putih (BMP) hahú halo terror ba jornalista sira hodi hateten; “Jornalsita STT tenke kuidadu. Bainhira ami hetan, ami sei oho nia. Jornalista STT nia prezensa ne’e desturba de’it komunidade, tanba ne’e ami tenke hasees (oho) tiha sira”.

La’ós to’o de’it iha ne’e, maibé odiu no vingansa ba jornalista STT liuliu ba jornalista Metha Guterres sai tiha hanesan “diabu” ida iha membru milísia BMP no militár Indonézia nia matan. Tanba ne’e, iha 13 abríl 1999, iha ema deskuñesidu na’in-ualu hafuhu no ba direta iha sala redasaun STT nian atu buka jornalista Metha Guterres. Maibé, Maromak boot, ema iha parte pikete nian hateten ba ema na’in-ualu ne’e katak jornalista Metha Guterres laiha ka la mai (tama servisu).

Sorte a’at mai nabanaban. Iha dadeersan fali, 14 abríl 1999, ema deskuñesidu na’in-ualu ne’e mai fali buka no hakarak hasoru malu ho jornalista Metha Guterres iha sala redasaun STT nian. Bainhira dehan, se bele hasoru jornalista sira seluk aleindn Meta Guterres, ema deskuñesidu sira-ne’e hatán ho razaun ne’ebé la klaru. 

Terror suli no mai beibeik, iha kalan fahe rua (00:00), redasaun STT simu telefone ilegál ida hodi dehan; “Jornalista STT sei iha ka lae”. Ema ne’ebé pikete ne’e hatán; “Jornalista STT fila hotu ona”. Rona ida-ne’e, ema ne’e hateten; “Ha’u ho ha’u-nia maluk sira, agora sei hakat ba sala redasaun STT”.

Hakat liu tiha loron rua, iha 17 abríl 1999, kuaze tuku 09:00, ema deskuñesidu na’in-ualu hakat ba iha sala redasaun STT hodi husu jornalista Metha Guterres ninia paradeiru iha ne’ebé lerek. Iha tuku 11:00, rona informasaun katak grupu milísia Besi Merah Putih (BMP) atu asalta edifísiu STT, entaun jornalista STT na’in-rua, Metha Guterres no João Barreto, deside husik hela Timor Timur ho aviaun Merpati Dili-Denpasar (Bali).

Iha tuku 12.00, antes aviaun Merpati semo (take off), rona informasaun katak edifísiu STT gurpu milísia Besi Merah Putih estraga no sunu mutuk tiha ona. Tuur iha aviaun Merpati nia laran, Metha Guterres, kala hamaus hirus matan hodi hein oras restu atu semo ba Bali-Jakarta-Indonézia, tanba nia naran tama lista mean milísia sira atu oho.

“Iha Jakarta, ami subar Metha Guterres iha uma Slipi. Dadeersan, iha nia toba dukur be dukur, Metha Guterres derrepente haksoit hosi kama leten no hakilar, ‘Tiru, tiru, tiru!’’ Meta Guterres hatoba nia isin-lolon iha sementu (lantai). Ha’u hakfodak, hafoin ha’u tebe nia ain. ‘Lian ne’ebá ne’e, lian fogetes nian. Ema Betawi mak kaben! Ó iha tiha ona Jakarta, la’ós iha Dili,” eis jornalista STT, Irawan Saptono, haktuir iha ninia varanda facebook.

Matebian Metha Guterres no Xanana Gusmão. Imajen/Espesiál.

Hanesan iha tinan 31 liubá ne’e (abríl 1999-2021), ne’ebé Meta Guterres hakfodak hosi nia toba dukur hodi hakilar liafuan “tiru, tiru!”, iha loron 06 juñu 2021, Metha Guterres ho naran sarani João Baptista Florindo da Costa Guterres lahakfodak atu hatán ba Maromak nia bolu hodi fila hikas ba Maromak nia uma, mate, iha Hospital Nacional Guido Valadares (HNGV), Dili.

Matebian Metha Guterres mate husik hela nia kaben Marlina de Carvalho da Silva no oan feto na’in-tolu, kompostu hosi Guilhermina Francisca da Silva Guterres, Carolina Francisco da Silva Guterres no Aleixadora Padua da Silva Guterres.

Iha loron ida-ne’e duni mak loron ikus, ba matebian Metha Guterres nia peregrinasaun iha mundu ne’e. Matebian tenke husik buat di’ak tomak ne’ebé nia halo iha nia moris tomak, liu-liu nu’udar jornalista ne’ebé uluk gosta hakerek kona-ba violasaun direitu umanu iha Timor-Leste, torturasaun, oho ema no referendu ba mídia sira iha rai-liur, oras ne’e hela de’it memória no inspirasaun ba jornalista jerasaun foun sira. Matebian Metha Guterres haloot iha tersa (08 juñu 2021) iha semitériu Becusse.

Hosi dasa rai sai jornalista

Matebian Metha Guterres nu’udar ema ida-ne’ebé ibun lais (rame) no gosta halo kómiku. Nia gosta halo ema seluk hamnasa maibé la gosta hamnsa bainhira hala’o serbisu, sei hala’o ho responsabilidade. Bainhira servisu, Metha Guterres la rende ba tempu no la kuñese loron ka kalan maibé nia servisu, servisu, no servisu ba nafatin.

Matebian Metha Guterres no Agio Perreira. Imajen/Espesiál.

Nia hahú hamout an iha mundu jornalizmu iha 01 fevereiru 1993, bainhira iha loron dahuluk jornál Suara Timor Timur (STT) harii no públika iha Timor Timur (agora Timor-Leste). Foufoun, nia hatoman aan nu’udar clening service (dasa rai) no fase ekipa tekniku Kompas Gramedia ne’ebé mai ajuda monta komputadór no ekipamentu selu-seluk ne’e, nia roupa.

Maibé hosi dasa rai ne’e, nia haknauk tempu aprende tan kona-ba grafika ka percetakan hafoin aprende layout ka pajinasaun. Hosi ne’e, nia hahú aprende téknika hadi’a komputadór no téknika hakerek notísia ne’ebé nia aprende barak liu hosi jornalista STT Irawan Saptono.

Hosi ne’e, neineik no beibeik, fiar ka la fiar, matebian Metha Guterres sai jornalista di’ak ida-ne’ebé la’ós de’it hakerek notísia ba jornál Suara Timor Timur (STT) maibé sai korespondente ba mídia internasionál sira hanesan Ajénsia Reuters, Associated Press no mídia BBC London no selu-seluk tan.

Matebian Metha Guterres hala’o nia knaar nu’udar jornalista  iha tempu Indonézia hahú hosi loron 01 fevereiru 1993 to’o 04  setembru 1999. Iha tempu Timor-Leste ukun aan, matebian kontinua nia knaar nu’udar jornalista iha 31 jullu 2000 bainhira jornál STT nakfilak-an ba Suara Timor Lorosae (STL) ho lema ”Matadalan ba Sosiedade Livre” to’o  iha tinan 2007.

Matebian mós sai fundadór Asosisaun Jornalista Timor Lorosa’e (AJTL). Matebian Metha Guterres aleinde husik hela obra liuhosi notísia sira, nia mós husik hela obra ida-ne’ebé nunka mate mak obra logotipu STL, ne’ebé públika 31 jullu 2000 to’o ohin sei uza nafatin. 

Hafoin, husik tiha nia knaar nu’udar jornalista hanesan Managing Editor iha STL iha tinan 2007, matebian Metha Guterres hala’o nia knaar nu’udar mídia officer iha Ministériu Defeza. Hafoin ne’e, nia servisu iha RTTL nu’udar membru board to’o no sai Asesor Mídia iha  Ministériu Komersiu Turizmu no Industria (MTCI, sigla portugés) to’o nia hakotu iis.

Matebian João Baptista Florindo da Costa Guterres “Metha Guterres” moris iha Uatu-Lari, Viqueque, 10 outubru 1971. Oan hosi Guilherme no Francisca Sousa.  Sei labarik, Meta Guterres eskola iha Eskola Primaria (EP) Kabira Oan iha Uatu-Lari, munisípiu Viqueque no Eskola Pre-Sekundária iha Salatiga, Provinsia Jawa Tengah (Indonesia). Metha Guterres kapasita nia aan ho edukasaun non formál hanesan tuir kursu jornalístiku nian iha  Lembaga Pers Dr. Soetomo, Jakarta (Indonesia) no hala’o kursu jornalístiku iha fatin barak.   

Hosi Metha Guterres ninia jornada moris, hahú hosi dasa rai sai jornalista di’ak ne’e la sees hosi ninia dedikasaun no kontribuisaun, liuhosi informasaun ka notísia sira-ne’ebé nia hakerek kona-ba violasaun direitu umanu, torturasaun ne’ebé akontese iha tempu okupasaun Indonézia hodi haruka ba rai-li’ur. Esperiensia osan-mean, ohin loron, sai hanesan referénsia no inspirasaun ba jornalista jerasaun foun sira atu moris banati.

Reflesaun hosi ninia domin no dedikasaun tomak ba rai-lulik Timor-Leste, ninia belun-di’ak no ninia mestre jornalizmu nian, eis jornalista STT Irawan Saptono espresa ninia domin hodi hakerek liafuan kmook ba Metha Guterres nia mate iha ninia varanda rede sosiál (facebook);

“Ha’u imajina Metha Guterres hamriik iha foho a’as Mundu Perdidu iha Ossú (Viqueque), iha tempu dadeersan bainhira abu-abu suli book-an hosi rai-luan ne’ebé kaer hamaus ninia ain-tutun sira, ha’u imajina Metha Guterres hananu múzika EH FOHO RAMELAU no hafoin ne’e ninia klamar semo ba fatin ida lahatene semo ba ne’ebé, dalaruma ba Foho Matebian nia tutun hanesan fatin ba matebian sira-nia klamar halibur hamutuk—Iha ne’ebé, só Maromak de’it mak bele haree no kaer toman”.

Jornalista: Cancio Ximenes

 Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here