Ministru Administrasaun Estatál (MAE), Miguel Pereira de Carvalho, lansa primeira pedra ba konstrusaun "Uma Kbiit Laek" iha Ermera. Imajen/Espesiál.

DILI, 10 juñu 2021 (TATOLI)—Ministru Administrasaun Estatál (MAE), Miguel Pereira de Carvalho, lansa primeira pedra ba konstrusaun “Uma Kbiit Laek” ba ema kbiit laek sira iha suku Katrai Kraik, postu administrativu Letefoho, munisípiu Ermera.

Governante kontente ho desizun komunidade iha suku refere ne’ebé deteta uluk benefisiariu dahuluk na’in-tolu ba programa importante ida-ne’e.

Notísia Relevante: Governu hahú ona konstrui “Uma Kbiit Laek” 1.254 iha territóriu nasionál

“Ida-ne’e hatudu imi iha koordenasaun di’ak no apoiu malu. Nu’udar ministru, reprezenta Governu hakarak hateten programa ida-ne’e la’ós to’o iha-ne’e de’it no ba ema na’in tolu ne’e de’it, maibé ba oin Governu kontinua tau osan kada tinan nune’e tinan tuir mai fó tán opurtunidade ba benefisiáriu iha aldeia seluk,” Miguel Pereira de Carvalho hateten liuhosi nota imprensa ne’ebé Agência TATOLI asesu, kinta ne’e. 

Ministru Administrasan Estatál, Miguel Pereira de Carvalho, akompaña hosi Diretór Jerál Dezenvolvimentu Rurál Rosito Guterres, Diretór Planu Dezenvolvimentu Integradu Munisipál (PDIM) Edgar Martins, Diretora Programa Nasionál Dezenvolvimentu Suku (PNDS) Claudina Pinto. Imajen/Espesiál.

Iha lansamentu ne’e, Ministru Administrasan Estatal Miguel Pereira de Carvalho akompaña hosi Diretór Jerál Dezenvolvimentu Rurál Rosito Guterres, Diretór Planu Dezenvolvimentu Integradu Munisipál (PDIM) Edgar Martins, Diretora Programa Nasionál Dezenvolvimentu Suku (PNDS) Claudina Pinto, Prezidente  Autoridade, Administrdór Postu Administrador Letefoho no Atsabe.

Nia dehan, tempu ona Governu tenke kombate pobreza liuhosi harii kondisaun uma dignu ba povu, tanba uma nu’udar nesesiade prioridade liu hodi garantia ema-nia moris sosiál no ekonómika.

Hafoin halo lansamentu primeira pedra ba konstrusaun Uma Kbiit Laek tolu iha Suku Katrai Leten ne’e, Ministru Administrasaun ho ninia komitiva hamutuk ho autoridade lokál no komunidade sira kontinua inaugura projetu estrada tipu rabat Betoun no ponti ida-ne’ebé komunidade harii liuhosi alokasaun PNDS iha tinan 2021.

Ministru Administrasaun Estatal ne’e mós hala’o mini diálogu ho autoridade komunitária sira hodi rona difikuldade no prioridade sira.

Entertantu iha diálogu ne’e, reprezentante komunidade sira aprezenta katak asesu ona eletrisidade, asesu ona projetu estrada rurál, maibé husu Governu tau atensaun ba bee-moos tanba bee-moos menus liu iha tempu bailoron.

Nune’e, nia informa ba komunidade sira katak iha tinan 2021 nu’udar tinan dahuluk deside aloka orsamentu ho 57% ba munisípiu  sira.

“Ida-ne’e hatudu Governu iha komitmentu atu investe rekursu finanseira ba munisípiu sira, nune’e ita boot sira bele identifika prioridade ho neneik maibé beibeik,” Governante ne’e realsa.

Notísia Relevante: Governu lansa primeira pedra ba konstrusaun “Uma Kbiit Laek” iha Liquiça

Jornalista: Evaristo Soares Martins

Editór: Cancio Ximenes  

HAKEREK NO HATÁN

Please enter your comment!
Please enter your name here