Família no sobrevivente-sira presta omenajen ba eroi no eroina-sira iha Monumentu Marabia, Lahane Osidentál, Dili, 10 juñu 2021. Imajen Tatoli/Arminda Fonseca

DILI, 10 juñu 2021 (TATOLI)- Iha loron 10 juñu 1980 (tinan-41 liubá), juventude-sira Frente Klandestina, hamutuk ho populasaun no forsa FALINTIL/FRETILIN organiza levantamentu hasoru forsa militár Indonéziu  iha instalasaun militár Indonéziu nian iha Dare no Becora, Dili.

Levantamentu ida-ne’e nu’udar mensajen estratéjiku ida ba komunidade internasionál katak FRETILIN sei eziste iha Timor no hamutuk populasaun funu ba ukun rasik an nian sei kontinua iha rai Timor Lorosa’e

Iha levantamentu ne’e, Timor-oan, juventude “Loriku Asua’in” barak maka militár Indonéziu kaptura, dadur no hetan torturasaun oioin to’o balun lakon ohin loron la haten isin no ruin, nune’e mós populasaun balun desterradu tiha ba Illa Ataúro.

Iha loron ida-ne’e, kinta (10/06/2021),  Timor-oan sira hanoin hikas fali levantamentu istóriku ne’e liuhosi atividade no serimónia simples balun liuhosi presta omenajen ba eroi no eroina-sira iha Monumentu Marabia, Lahane Osidentál.

Koordenadór Nasionál Asosiasaun Vítima Timor-Leste nu’udar mós Koordenadór Jerál Komisaun Marabia, Domingos Moniz hateten, loloos loron ne’e sobrevivente-sira halibur atu selebra loron istóriku-ne’e, maibé tanba situasaun pandemia COVID-19 ne’ebé Timor-Leste aplika medida Estadu Emerjénsia, serka sanitária no konfinamentu obrigatóriu, maka Komisaun Marabia la halo selebrasaun boot mai halibur malu presta de’it omenajen ba eroi no eroina-sira.

“Ita komemora loron levantamentu Marabia ba dala-41, tanba situasaun COVID-19, ita la halo buat ida, mai tau de’it ai-funan no lilin ba Monumentu atu hanoin fila-fali akontesimentu ne’ebé akontese iha loron 10 juñu 1980,” Domingos Moniz hateten ba Agência Tatoli.

Nia haktuir, kada tinan, Komisaun Marabia hamutuk sobrevivente no família matebian selebra loron levantamentu Marabia tanba levantamentu Marabia mós nu’udar loron importunate ba Timor-Leste ninia funu luta ba independénsia.

Dokumentu istóriku Estadu nian ne’ebé preserve iha Centro Nasional Chega (CNC) hatudu katak levantamentu Marabia hanesan primeiru levantamentu nasionál, hafoin baze apoiu rahun liuhosi forsa ofensiva boot militár Indonézia nian iha 1978-1979.  Ne’ebé FRETILIN hanaran Cerco e anaquilamento.

Hahú iha 1978 nia klaran, forsa Indonézia halo ataka boot ba iha setór Fronteira Sul no setór Fronteira Norte. Nune’e mós kontinua ataka ba iha setór Leste   hodi serku baze apoiu rezisténsia nian iha foho Matebian no iha área foho Natarbora, Manatuto to’o iha 1979.

Dokumentu istóriku iha CNC ne’e deskreve mós katak forsa ofensivu Indonézia nian konsege harahun hotu baze FRETILIN-FALINTIL nian hosi setór Leste .

Liutiha baze apoiu nakfera ka rahun, forsa Indonézia nian komesa halo propaganda katak rezisténsia Timor-oan nian komesa lakon daudaun ona. Governu Indonézia ne’ebé lidera hosi Prezidente Soeharto, tempu ne’ebá, halo kampaña internasionál hodi hateten funu iha Timor la iha ona no povu Timor tama ona ba faze dezenvolvimentu.

Iha loron 10 juñu 1980, FALINTIL sira ne’ebé fahe-malu ona ba forsa ki’ik komesa organiza malu tanba rona dehan iha delegasaun ida hosi Portugál atu vizita Timor-Leste.

Ho forsa ne’ebé ki’ik kuaze ema 120 ho kilat lolon-60   halo asaltu ba fatin ne’ebé  sai alvu ba FALINTIL sira. Objetivu hosi levantamentu ne’e atu hatudu ba mundu  FRETILIN sei eziste iha Timor no funu ba ukun rasik an nian sei kontinua iha rai Timor Lorosa’e.

Vise-Prezidente Komisaun Marabia, Lourenço da Conçeicão, subliña tan, loron 10 juñu, konsidera hanesan insurreisaun daruak ba armada tanba insurreisaun armada foti iha Munisípiu Aileu hahú prosesu luta libertasaun nasionál, bainhira tinan tolu iha ai-laran baze apoiu rahun, Indonézia deklara katak Timor FRETILIN no FALINTIL laiha ona.

“Buka-malu no halibur-malu halo levantamentu 10 juñu  1980 nian atu inspira ba eis kombatente hotu-hotu no inspira ba maluk FALINTIL sira ne’ebé iha ai-laran atu ita bele buka malu kontinua prosesu luta ne’e. tanba ami-sira ne’ebé militár Indonézia kaptura maka ami-nia isin lolon de’it, maibé ami-nia konsiénsia no prinsípiu kontinua luta to’o hetan independénsia,” Lourenço da Conçeicão.

Hola parte iha serimónia “hanoin hikas” levantamentu Marabia ba tinan-41 (1980-2021) ne’e mak hanesan, estrutura Komisaun Marabia, Asia Justice and Rights (AJAR), Asosiasaun HAK no família martires-sira.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here