Pasiente iha sala maternidade, Ospitál Referál Maliana (HRM sígla portugés). Imajen Tatoli/Sérgio da Cruz.

BOBONARO, 10 juñu 2021 (TATOLI)—Durante fulan lima hahú hosi janeiru to’o maiu, Ospitál Referál Maliana (HRM sígla portugés), rejista bebé ne’ebé moris iha sala maternidade hamutuk 305.

Hosi númeru ne’e, janeiru to’o marsu rejista bebé na’in 160 moris ho kondisaun normál no na’in 14 halo operasaun, iha fulan abríl to’o maiu bebé ne’ebé moris ho kondisaun normál hamutuk 116 no na’in 15 halo operasaun.

Notísia relevante:COVID-19: Bobonaro transfere pasiente grave ida ba Vera Cruz

Diretór ezekutivu HRM, Bourldaloue Fernandes Moniz, hateten entre inan-sira ne’ebé mai partus, iha na’in-tolu mak tenke transfere ba halo operasaun iha izolamentu Verra Cruz, Dili, tanba pozitivu COVID-19.

“Ami haruka na’in-tolu ba Vera Cruz, tanba iha ida mak grave,” Bourldaloue Fernandes Moniz, hateten ba jornalista Tatoli iha HRM, kinta ne’e.

Kona-bá kondisaun iha maternidade HRM, Bourldaloue Fernandes Moniz garante katak, laiha problema tanba fasilidade sufisiente no mós atendimentu hosi parteira-sira di’ak tebes.

Dadus hosi HRM, hosi númeru ne’ebé iha maihosi munisípiu Bobonaro-rasik, inklui parte Zumalai munisípiu Covalima, Atsabe munisípiu Ermera no Loes munisípiu Bobonaro.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here