Diretór ezekutivu HRM, Bourdalaut Ferreira Moniz. Imajen Tatoli/Sérgio da Cruz.

BOBONARO, 10 juñu 2021 (TATOLI)—Ospitál Referál Maliana (HRM sígla portugés), reativa hikas atendimentu hanesan baibain iha 03 juñu, hafoin estende durante semana rua tanba pesoál saúde na’in 20-resin infetadu COVID-19, no oras-ne’e rekoperadu.

Diretór ezekutivu HRM, Bourdalaut Ferreira Moniz, hateten durante semana rua atende de’it pasiente emerjénsia no restante haruka ba Sentru Saúde Maliana, maibé agora la’o normál ona.

Notísia relevante:Bobonaro preparadu simu vasina AstraZeneca doze daruak

“Ami-nia funsionáriu hamutuk 20-resin ne’ebé  pozitivu, rekoperadu ona no hela na’in-rua mak sei iha izolamentu. Tanba ne’e agora atendimentu hanesan baibain,” Bourdalaut Ferreira Moniz, hateten ba Agência Tatoli iha HRM, kinta ne’e.

Mekanizmu atendimentu durante serka sanitária, parte HRM sempre aplika Sistema triagem, hosi rezultadu ne’e maka indika pasiente ne’e atu halo tratamentu iha departamentu ne’ebé estabelese ona no balun ne’ebé iha sítomas kona-bá Infesaun Respiratóriu Aguda (IRA) médiku-sira halo kedan ezame espesiál.

Problema ne’ebé HRM hasoru maka, menus estoke ai-moruk fuan-nian, no parte HRM aprezenta ona ba Serbisu Autónomu Medikamentu no Ekipamentu Saúde (SAMES) atu bele konsidera.

Kona-bá ai-moruk seluk estoke sufisiente, inklui Ekipamentu Protesaun Pesoál (EPP) no transporte operasionál-nian laiha problema.

Tuir observasaun Agência Tatoli, atendimentu iha HRM kumpre protokolu saúde hanesan, uza máskara, mantein distánsia sosiál, teste temperatura pasiente molok konsulta, no fase liman ho sabaun.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here