Ministru Obra Públika, Salvador Eugênio Soares dos Reis Pires. Imajen TATOLI/Francisco Sony

DILI, 10 juñu 2021 (TATOLI)Governu liuhosi Ministériu Obra Públika (MOP), Ministériu Petróleu no Minerál (MPM) no Ministériu Koodenadór Asuntu Ekonómiku (MKAE) atu regulariza atividade kee rai-henek iha mota laran, hanesan iha ponte CPLP, Comoro.

Ministru Obra Públika, Salvador Eugênio Soares dos Reis Pires, fó ona orientasaun ba entidade relevante atu haree kestaun ne’e.

“Ha’u fó orientasaun ba Diresaun Jerál Obra Públika, tanba kestaun téknika no liga mós ba servisu hamutuk ho Autoridade Nasionál Petróleu no Minerál (ANPM) no MKAE atu haree estrasaun mineiru, liuliu rai-henek ba atividade ekonómika ita tenke regulariza,” Ministru Salvador hateten, iha salaun Hotel Novo Turismo, Lecidere, kinta ne’e.

Kee rai-henek besik liu infraestrutura ezistente, bele fó impaktu ba seguransa ponte sira.

“Klaru katak ita halo estrasaun rai-henek sira liu fali alirserse ponte nian (ponte CPLP), bele fó ameasa ba ponte ne’e rasik no halo estragu iha futuru,” nia akresenta.

Iha parte seluk, Ministru Petróleu no Minerál, Víctor da Conceição Soares, hateten, estrasaun rai-henek no fatuk ho kategoria C, liuliu atividade ba konsumu interna ba konstrusaun uma no estrada laiha lisensa espesiál.

“Ha’u hanoin iha regra, maibé la presiza hetan lisensa espesiál no hetan kontrolu ka avaliasaun inklui regula hosi Diresaun Downstream ANPM nian, maibé atu foti volume boot ho kategoria A no B, liuliu ba esportasaun ne’e normalmente mai iha ministériu atu fó lisensa,” nia hatutan.

Kona-ba kategoria C, regula no kontrola hosi MOP, Sekretaria Estadu Ambiente (SEA) no ANPM.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here