Illa Ataúro. Imajen/Espesiál

DILI, 10 juñu 2021 (TATOLI)—Governu liu hosi Ministériu Interiór (MI) ho Polísia Nasionál Timor-Leste (PNTL), harii postu Unidade Polísia Maritima (UMP), iha área aldeia Akrema, suku Bikeli, postu administrativu Ataúro, munisípiu Dili, ne’ebé sei inaugura iha tempu badak.

Portavóz Komandu Jerál PNTL, Superintendente Xefe, Arnaldo de Araújo, hateten postu foun ne’e sei inaugura hosi Primeiru Ministru (PM), Taur Matan Ruak hanesan mós Ministru Interiór (MI), ne’ebé sei akompaña hosi, Vise-Ministru Interiór, António Armindo, Komandante Jerál PNTL, Komisáriu Polísia, Faustino da Costa, iha sesta (11/06).

Notísia relevante:PM Taur inaugura postu UPF iha Bobonaro

“Ministru Interiór ho Vise Ministru mak sei hala’o inaugurasaun,” Arnaldo de Araújo hateten ba jornalista-sira iha Komandu Jerál PNTL, Caicoli, kinta ne’e.

Maski la temi montante orsamentu ho medida edifísiu, maibé Arnaldo de Araújo, esplika postu UPM ne’e harii tanba hetan apoia hosi parseiru dezenvolvimentu Police Development Programme (TLPDP).

“Postu ne’e harii hodi ajuda PNTL reforsa kontrolu movimentu ilegál hosi abitante-sira nasaun viziñu Indonézia,” nia subliña.

Komandante UPM, Superintendente Assistente, Basílio de Jesus koloka ona membru ho ekipamentu hanesan ró patrullamentu ida, hodi fasilita movimentu kontrolu.

Komandante ne’e aprezenta mós proposta ba Komandu Jerál PNTL, atu fó apoiu rádiu komunikasaun no telephone ba membru-sira, tanba área ne’ebé izoladu hosi dezenvolvimentu, la asesu ba eletrisidade, bee moos no problema sosiál seluk tan.

Antes ne’e, TLPDP harii ona postu ba Unidade Patrullamentu Fronteira (UPF), iha área We-Fauk, postu administraitivu, Balibo, munisípiu Bobonaro no postu UPF iha Batuboro, munisípiu Liquiça.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here