Diretór ESJ Dom Martinho da Costa Lopes Malina (DMCL), Juvêncio de Jesus. Imajen Tatoli/ Sérgio da Cruz.

BOBONARO, 10 juñu 2021 (TATOLI)—Estudante hosi Eskola Sekundária Jerál (ESJ), Dom Martinho da Costa Lopes Malina (DMCL), laiha telemóvel android atu partisipa aula online durante periúdu serka sanitária.

Diretór eskola, Juvêncio de Jesus, hateten tempu serka sanitária oportunidade di’ak ba estudante sira hakmatek iha uma, no idaidak bele partisipa aula online hosi uma, maibé ekonómikamente maioria inan-aman hosi estudante-sira laiha osan atu sosa telemóvel android.

Notísia relevante:Serka sanitária Dili, Bobonaro no Covalima kontinua to’o loron 14

Do que sira iha uma la halo buat ida, sira bele partisipa aula online tanba edukasaun laiha fronteira. Maibé, difikuldade boot liu maka inan-aman sira laiha osan atu hola telemóvel android,” Juvêncio de Jesus, haktuir iha rezidénsia, Maravilla, Holsa, kinta ne’e.

Tanba ne’e, antes implementasaun serka sanitária, parte eskola hola inisiativa hodi halo rezumu matéria no fó ba estudante-sia halo kopia hodi apreende mesak iha uma no bainhira reativa aula prenzensiál mak profesór-sira halo esplikasaun.

Diretrór ne’e husu ba estudante-sira, atu kumpre nafatin protokolu saúde no labele lakon vontade, atu apreende nafatin matéria ne’ebé simu ona.

Estudante, Miguel dos Santos, hateten nia labele partisipa aula online tanba inan-aman laiha telemóvel android, tanba ne’e, nia deside hodi apreende mesak matéria ne’ebé simu ona.

“Ha’u labele tuir aula online tanba telemóvel mak laiha duni, depois laiha osan atu hola pulsa,” nia haktuir.

Totál estudante efetivu iha EJS Dom Martinho da Costa Lopes, Maliana, hosi désimu anu to’o désimu segundu anu, hamutuk 2.586 ho totál profesór na’in 50.

Ministériu Edukasaun Joventude no Desportu (MEJD) lansa ona programa Eskola ba Uma no Tele-eskola ba estudante Ensinu Báziku terseiru síkulu, Ensinu Sekunadria Jerál (ESJ) no Tékniku Vokasionál (TEKVOK), iha 31 marsu tinan ne’e.

Programa ne’e aplika ba munisípiu ne’ebé Governu impoin serka sanitária, hodi suspende atividade aula prezensiál, no estudante-sira bele akompaña de’it iha televizaun nasionál-sira, inklui Buletim Sapientia ne’ebé fó-sai kada fulan.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here