Diskursu Pezidente Repúblika, Francisco Guterres ‘Lú Olo, iha ámbitu lansamentu livru ’Buibere Hamriik Ukun Rasik-an’, iha Palásiu Prezidensiál, Bairro Pité, kinta (10/06). Imajen TATOLI/Francisco Sony

DISKURSU S.E. PRESIDENTE RDTL IHA SERIMÓNIA KOMEMORASAUN LEVANTAMENTU MARABIA, LANSAMENTU LIVRU ‘‘BUIBERE HAMRIK UKUN RASIK AN’’ NO KONDEKORASAUN ORDEM TIMOR-LESTE BA SAUDOZA ‘BI-KIAK’

Palásiu Prezidensial Nicolau Lobato, 10 juñu 2021
Señora Vice-Prezidente Parlamentu Nasionál
Señor Primeiru-Ministru
Señor Prezidente Tribunal Rekursu
Dignísimus líderes Istórikus no Eis-Titulares
Señores Membrus Parlamentu
Señores Membrus Governu
Señora Sekretária-Jerál Interina OPMT
Señor Prezidente Konsellu Kombatentes Libertasaun Nasional
Señor Diretor Ezekutivu Centro CHEGA
Senhor Prezidente Museu da Resistência
Señora Koordenadora Comissão de Pesquisa e Elaboração da História da Luta da Mulher Timor akompanã husi sekretariadu tékniku, peskizador, hakerek-nain, editor no kontribuinte sira
Sobrevivente sira asosiadu ho levantamentu Marabia
Feto asu’uain Timor-Leste hothotu
Família husi saudoza Merita Alves “Bi Kiak”

Señoras konvidadas no konvidadus
Exelénsias
Ho laran-ksolok tebes no orgullu boot mak ha’u lansa ohin obra importante ida, la’ós de’it ba ita-nia feto asu’uain sira, maibé ba mós ita hothotu, jerasaun ohin nian no abanbairua nian.

Livru sura istória luta barani feto sira-nian lansa iha Palásiu Prezidensial Nicolau Lobato asosia ho data importante tebes ida, iha ita-nia Luta Libertasaun Nasional: levantamentu Marabia, iha 10 juñu 1980.

Husi ita-nia istória rasik, mak ita bele hasai lisaun oioin ba ita-nia moris ohinloron no ba abanbairua. Istória sura iha livru “Buibere Hamriik Ukun Rasik An” haree ba pasadu ida ne’ebé nakonu ho barani, determinasaun no dedikasaun, maibé ho mós halerik oioin ne’ebé sei hakanek hela sobrevivente sira.

Livru ne’e mai husi inisiativa Organizasaun Popular da Mulher Timor (OPMT), nu’udar organizasaun massas FRETILIN nian, maibé reflekte feto hothotu ninia kontribuisaun ba luta, husi tinan 1974 to’o 1999.

Ho kontestu koletivu ida ne’e mak Líder Istóriku hothotu fó apoiu total no inkondisionál, hahú ho festa angariasaun fundus iha tinan 2010 no hetan mós apoiu finanseiru husi Gabinete Primeiru-Ministru. Organizasaun oioin, maluk timoroan no belun barak tebes, inklui emprezáriu sira, hatán ho apoiu di’ak tebes ba inisiativa ida ne’e.

Ho haksolok boot mak ha’u haree katak ekipa hothotu, harii ba produsaun livru ne’e, kahor feto ho mane, jerasaun tuan ho jerasaun foin-sae.

Dalan ida ne’e permite fahe esperiénsia no tau hamutuk matenek ida-idak nian, husi jerasaun oioin no konsege duni prodús obra koletiva ida ne’ebé sura no interpreta Istória Luta Libertasaun Nasionál ho perspetiva timoroan sira-nian, ho apoiu husi ita-nia belun boot tolu, ho fuan timor: Nugroho, Titi no Kelly Silva.

Obra ida ne’e mak foin fó-sai ba dahuluk, no klean tebtebes, saída loos mak feto Timooan sira halo ho barani, nu’udar indivíduu ka liuhusi organizasaun polítiku-partidária ka lae, husi 1974 to’o 1999, iha rai-laran no iha rai-li’ur.

Ita-nia buibere sira hatene duni foti inisiativa, organiza-an ho espíritu kriativu no matenek rasik, hatene mós oinsá lidera knaar oioin ne’ebé dala barak envolve mós mane sira, tuir kbiit ho meiu sira ne’ebé iha, hodi partisipa iha prosesu luta libertasaun Pátria iha fente luta hothotu.

Nune’e, obra ne’e reflekte importánsia papel feto sira-nian iha prosesu tomak luta nian, iha Frente tolu: Armada, Klandestina no Esterna.

Líder istóriku nain lima asosia-an mós ho livru ne’e tanba sai autor ba prefásiu. Nune’e, líder sira ne’e mós rekoñese no valoriza feto Timoroan sira, nu’udar parseiru luta-nain! Aleinde Prezidente Repúblika, prefásiu hakerek mós husi líder istóriku haat tuir mai: Senhor Xanana Gusmão, Dr. José Ramos Horta, Señor General Taur Matan Ruak no Dr. Mari Alkatiri.

Ne’e bé, livru “Buibere Hamriik Ukun Rasik An” iha dimensaun nasional, ho valor sosiál, polítiku, istóriku no edukasionál as tebes ba jerasaun hotuhotu.

Exelénsias,
Maluk doben sira
Bainhira ita valoriza feto Timoroan nu’ udar parseiru luta-nain, ita hasa’e mós fiar metin ba sira nia potensialidades atu kontinua luta hamutuk ho ita ba Libertasaun Povu!

Hakarak ka lakohi, ohinloron, populasaun feto Timor-Leste, kuaze metade populasaun ita-nian. Nune’e, feto sira sai forsa boot ida ne’ébé ita labele hasees. Ho de’it feto sira-nia partisipasaun tomak mak ita bele hetan susesu iha prosesu dezenvolvimentu ba hamenus kiak iha ita-nia Rai doben.

Ita presiza haree ba feto sira, liuliu nu’udar inan, riin forte ne’ebé fó balansu ba ita ida-idak no tanen família ida-idak atu sai forte no saudável babeibeik.

Inan hatene hakiak no fahe domin! Hatene hametin laran-hakmatek no responsabilidade ba sira-nia oan, ho nune’e, ita bele sustenta pás no estabilidade iha ita-nia Rai doben.

Prezidente Repúblika hein katak livru ne’ e sei loke hotuhotu nia neon atu hasa’e as feto sira, iha aspetu hothotu. Sira prova ona katak sira mós hala’o knaar susesu iha frente luta hothotu.

Ha’u hein katak livru ne’e sei hetan espasu espesiál iha biblioteka nasionál, Arkivu Nasionál, Muzeu Rezisténsia, Konsellu Kombatentes Libertasaun Nasionál, CHEGA no biblioteka instituisaun públika sira-nian no sei tama mós nu’udar material estudu, iha eskola hothotu no Universidade sira.

Enkuantu ita kuda interese nafatin atu haree ba pasadu nu’udar fonte inspirasaun ba ohinloron no abanbairua, ita bele hametin babeibeik ita-nia orgullu pertense ba Rai doben ida ne’e, ho Povu ida ho identidade no istória ho karaterístika rasik no úniku.

Nu’udar atu rekoñesimentu no valorizasaun ba esforsu halibur testemuñu liu atus ualo iha Timor-Leste tomak no prodús duni obra koletiva ida, Prezidente Repúblika deside fó sertifikadu louvor koletivu ida ba Comissão de Pesquisa e Elaboração da História da Luta da Mulher Timor.

Exelénsias,
Maluk doben sira
Prezidente Repúblika tau aas obra koletiva “Buibere Hamriik Ukun Rasik An”! Maibé, iha prosesu peskiza, hakerek no prodús obra koletiva ida ne’e, ita hatene katak maluk balun mak dada dalan, organiza, koordena, inspira no kaer metin mehi koletivu ne’e to’o nakfila ba realidade. Ida mak ita-nia Buibere Merita Alves “Bi Kiak” ne’ebé husik ona ita, iha 24 maiu liubá.

Bainhira moras hela, sempre preokupa ho lansamentu livru ida ne’e nu’udar dalan ida atu haklaken no lori sosiedade tomak atu rekoñese no valoriza feto.

Ho mós informasaun husi vídeo hatudu ohin, husi livru no dokumentasaun sira seluk ha’u lee ona no mós husi testemuñu oioin, inklui husi ha’u rasik, ita-nia buibere Merita Alves hatudu duni ba ita hotu oinsá nia kumpre dever serve Pátria.

Haree ba nia ezemplu entermus dedikasaun, barani, espíritu sakrifísiu no determinasaun, iha períodu tomak luta libertasaun nasionál no, iha mós iha tempu ukun an, atu hatuur jutisa sosiál, Prezidente Repúblika deside fó onra, títulu póstumu, ba Buibere Merita Alves “Bi Kiak”, ho kondekorasaun Ordem Timor-Leste, grau Colar, títulu póstumu.

Grau ida ne’e as liu ne’ebé Prezidente Repúblika bele fó ba entidade ka individualidade, tuir Dekretu-Lei númeru 20/2009 ho data 6 maiu, Ordem de Timor-Leste.

Ho kondekorasaun espesiál ne’e, Prezidente Repúblika, ho Estadu Timor-Leste nia naran, hasa’e as memória eroína ida nian ne’ebé husik hela legadu boot ida ba ita hotu.

Povu doben
Maluk sira
Loron ba lansamentu livru importante ne’e no kondekorasaun ba saudoza Buibere Merita Alves akontese hotu iha data istórika importante ida ba ita-nia luta libertasaun nasionál.

Hafoin Bases de Apoio rahun iha 1979, inimigu hanoin katak Rezisténsia mate tiha ona no fó-sai ba mundu katak Povu Timur-Timur hili tiha ona dalan integrasaun no pembangunan ho Indonézia.

Maibé, membru sobrevivente FALINTIL sira, ne’ebé organiza-an fila fali iha arredores no Dili laran, konsege duni fó sinal oinseluk ba mundu ho levantamentu iha Marabia, iha loron 10 junu 1980. Ho forsa kiik ida, besik ema atus ida rua nulu ho kilat neen nulu resin, FALINTIL, ho apoiu populasaun nian, halo asaltu ba fatin sira ne’ebé tropa indonéziu hela, hanesan Marabia, Dare, Fatunaba no Becora.

Objetivu atake ne’e nian mak hatudu ba mundu katak FRETILIN sei eziste iha Timor-Leste no, Funu ba Ukun Rasik An sei kontinua!

Hetan duni objetivu ida ne’e maibé inimigu kaer no lori-lakon to’ o ohin loron ita-nia ema liu atus ida rua nulu. Barak mak hetan dadur, inklui desterru ba Ataúro no balun tenke hatán ba interrogatóriu beibeik.

Partisipa iha serimónia ida ne’e, eis-prizioneira ida, ita-nia Buibere Catarina de Araújo, ne’ebé ohinloron kaer kargu nu’ udar Vise-Presidente Comisaun 10 de Junho de 1980, Marabia. Hein katak partisipante no vítima sira sei publika mós livru ruma hodi sura loloos sira-nia istória barani.

Maluk asu’ uain sira
Povu doben Timor-Leste
Molok ramata ha’u hakarak bolu atensaun hothotu nian ba situasaun feto sira-nian iha ita-nia sosiedade ohinloron.

Livru “Hamriik Ukun Rasik An” hatudu prova barak katak ho duni feto sira-nia kontribuisaun mak ita konsege hetan Ukun rasik an. Feto sira mós sai eróina iha tempu luta ba Ukun Rasik An.

Tanba ita-nia Luta Libertasaun Nasionál envolve mós feto, Konstituisaun hatuur mós direitu hanesan entre feto no mane no ita hatuur polítika edukasaun ba ema hotu, dalan nakloke liután ona ba ita-nia feto sira atu partisipa iha prosesu dezenvolvimentu nasional.

Biar dalan nakloke dadaun, ita hotu hatene katak feto barak tebes mak moris ho tauk no halerik subar hela iha uma. Situasaun sira ne’e akontese tanba ema barak sei kaer metin tradisaun negativu ne’ebé hanehan feto maka’as. Feto barak hasoru hela violénsia doméstika no abuzu seksual ho forma oinoin, inklui labarik-feto sira.

Atu lori ita-nia País ba oin ho susesu, ita tenke hakotu hodi biit no lalais abuzu sira iha uma laran ka ha fatin ne’ebé de’ it, ho razaun ne’ebé de’it.

Prezidente Repúblika fiar katak liuhusi edukasaun ho valores hanesan domin, respeitu no espíritu solidariedade entre ema, hahú husi otas kiik kedas, mak ita bele hadi’ak sosiedade ninia komportamentu ba abanbairua.

Ba jerasaun ohinloron nian, ha’u aproveita oportunidade ida ne’e hodi apela ba família no sosiedade tomak no ba entidade hothotu, atu hadomi no respeita liután ita-nia feto sira, tanba sira mak ai-rin metin ba família no ba sosiedade.

Husu boot ba Parlamentu Nasional, Governu, PNTL, Prokuradoria-Jerál Repúblika no Tribunal sira atu hamutuk proteje vítima sira, inklui labarik feto sira, no hatuur justisa loloos ba sira ne’ebé komete krime.

Tanba ita hasa’e ohin memória eroína no erói sira-nian asosiadu ho levantamentu Marabia, Prezidente Repúblika husu ba hothotu buka dalan atu nakfilak sira-nia mehi ba realidade. Sira luta ba liberta Povu, inkui mós ita-nia feto sira iha Timor-Leste tomak!

Ne’e mak mehi boot mós husik hela husi ita-nia feton, bin ka alin Merita Alves “ Bi Kiak” ne’ebé Prezidente Repúblika ohin kondekora ho Ordem Timor-Leste atu fó honra nu’ udar eroína Timor-Leste. Ho lala’ok ida ne’e, Prezidente Repúblika konvida jerasaun foun atu banati tuir ninia ezemplu.

Ho apoiu husi ita hotu, liuliu husi Governu, liuhusi Conselho dos Combatentes da Libertação Nasional, Museu da Resistência no Centro Chega, Prezidente Repúblika hein katak Comissão de Pesquisa e Elaboração da História da Luta da Mulher Timor sei hakaat ho susesu ba publikasaun faze daruak: Kombatente feto ida, istória ida! Nune’e, ita halo Povu Timor-Leste nia istória rasik!

Viva Feto Timor-Leste!
Viva solidariedade entre mane no feto!
Viva Eroínas no Eroís Marabia nian!
Viva Povu Timor-Leste.

HAKEREK NO HATÁN

Please enter your comment!
Please enter your name here