Koordenadór tékniku Sala Situasaun, CIGC, munisípiu Baucau, Salesitiano Pinto Fernandes. Imajen TATOLI/Natalino Belo

BAUCAU, 10 juñu 2021 (TATOLI)–Koordenadór tékniku Sala Situasaun, Sentru Integradu Jestaun Krize (CIGC, sigla portugés) munisípiu Baucau, Salesitiano Pinto Fernandes, hateten, CIGC liuhosi autoridade munisipál, postu admistrativu hotu, inklui komunidade sei hamutuk kombate COVID-19.

“Ita hotu halo esforsu, tanba ne’e bainhira komunidade sira la’o sai la uza masker no la’o livre hela, Sala Situasaun preokupa hela situasaun ne’e, la’ós Baucau de’it, maibé territóriu Timór hotu maibé ita haree bá Baucau nia númeru a’as liu tanba totál kazu hosi marsu 2020 to’o agora hamutuk 328,” Koordenadór tékniku CIGC informa, iha Administrasaun munsípiu Baucau, kinta ne’e.

Tanba ne’e, Autoridade munisipál, liu-liu CIGC esforsu nafatin liuhosi pilar hotu atu serbisu nafatin kombate COVID-19.

Nia hateten, númeru kazu COVID-19 iha munisípiu Baucau kada loron aumentu ba beibeik, tanba ne’e iha posibilidade sei tama ba transmisaun komunitária tamba bazeia ba dadus.

Notísia relevante: COVID-19: tuir klasifikasaun OMS, Dili hahú tama transmisaun komunitária

Koordenadór tékniku haktuir, iha kuarta (09/06), Sala Situasaun rekolla uma ida ho membru família hamutuk lima, pozitivu hotu iha postu administrativu Baucau villa, suku Tirilolo, aldeia Lutumutu.

“Horiseik kedan ita evakua inklui labarik bebé ida fulan tolu,” nia akresenta.

Tuir dadus CIGC, iha kuarta ne’e, durante oras 24 nia laran deteta kazu hamutuk 17, kompostu hosi mane na’in-10 no feto na’in-hitu, ne’ebé hosi númeru ne’e balun hosi área afetadu Dili no munisípiu Baucau rasik, inklui balun hosi viajen bá munisipiu Lautém no Viqueque.

Kazu hamutuk 17, kompostu hosi Dili na’in-lima, Baucau laran na’in-10 no na’in-rua seluk, ida viajen bá Lautém no ida bá Viqueque.

Notísia relevante: COVID-19: pozitivu 79, rekoperadu 256 no ativu 1.938

Tuir dadus hosi Sala Situasaun CIGC nasionál, daudaun ne’e munisípiu Baucau rasik rejista kazu ativu hamutuk 217, rekupera na’in-94, no kazu rejistadu hamutuk 311.

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here