UE no parseiru akompaña hatun kargu vasina hosi Aviaun, iha Aeroportu Internasionál Prezidente Nicolau Lobato, Comoro, Dili, kuarta (09/06). Imajen/UE

DILI, 09  juñu 2021 (TATOLI)–Embaixadór Uniaun Europeia (UE) iha Timor-Leste, Andrew Jacobs, hateten, UE komprometidu kontinua tulun Governu Timor-Leste hodi luta kontra COVID-19.

“Ami sei kontinua nafatin hamutuk ho povu Timor-Leste hodi luta hasoru COVID-19 no ajuda garante katak funu ne’e sei manan,” Embaixadór UE dehan liuhosi nota ne’ebé Agência TATOLI asesu, kuarta ohin.

Nia parte sente haksolok ho esforsu hamutuk ho parseiru sira, bele entrega vasina hosi COVAX.

Notísia relevante: AstraZeneca doze daruak 100.800 to’o ona TL

“Ida-ne’e hanesan ilustrasaun di’ak ida kona-ba solidariedade globál. Uniaun Europeia orgullu hamutuk ho Governu Timor-Leste, Organizasaun Mundiál Saúde (OMS), United Nations Children’s Fund (UNICEF), inklui kontribuinte seluk hodi halo ida-ne’e akontese,” nia akresenta.

Programa COVAX hanesan inisiativa multilaterál, ne’ebé UE ninia Estadu membru sira no Banku Investimentu Europeu kontribui ona biliaun $2,6, atu garante realizasaun fornesimentu vasina COVAX hamutuk biliaun 1,3 ba nasaun sira ho rendimentu menus no médiu, inklui Timor-Leste.

Aleinde apoiu hosi COVAX, Ekipa Europa orgullu tebes fó apoiu ba Timor-Leste kombate COVID-19, desde marsu 2020, ho totál apoiu finanseiru millaun $6,4, inklui besik millaun $1,2 ne’ebé disponível hosi OMS ba servisu imediata COVID-19 hosi Eskritóriu Umanitária Uniaun Europeia (ECHO, sigla inglés).

Apoiu ne’ebé fó, inklui ona millaun $2,4 ba OMS, hodi fó apoiu ba ninia servisu hamutuk ho Ministériu Saúde (MS) atu hamenus impaktu saúde hosi moras hirak ne’ebé bele hada’et iha komunidade nia le’et, liuliu COVID-19 no kontribui ba konstrusaun sistema saúde ne’ebé forte, efikás no reziliente iha Timor-Leste.

Aleinde ne’e, Ekipa Europeia mós fornese ona apoiu liuhosi organizasaun sosiedade sivíl sira, atu ajuda ema vulnerável sira ne’ebé afetadu COVID-19 no liuhosi inisiativa spotlight, foka liu ba asisténsia ba sira ne’ebé iha risku violénsia doméstika.

EU ninia Estadu membru no Banku Investimentu Europeu sente orgullu atu kontribui liuhosi programa COVAX, hodi tulun no garante katak timor-oan sira bele iha asesu vasina, liuhosi parseria ho OMS, inisiativa globál GAVI, UNICEF no parseiru sira seluk.

Asegura mós katak ema hotu iha asesu ba vasina COVID-19 ne’ebé seguru no efetivu, sai nu’udar prioridade a’as liu ba UE desde luta kontra pandemia globál ne’ebé laiha ema ida mak moris seguru to’o ema hotu seguru.

Jornalista: Natalino Costa

Editora: Julia Chatarina 

HAKEREK NO HATÁN

Please enter your comment!
Please enter your name here