Prezidente Tribunal Rekursu, Deolindo dos Santos. Imajen Tatoli/Antonio Goncalves.

DILI, 09 juñu 2021 (TATOLI)—Prezidente Tribunál Rekursu (PTR) Deolindo dos Santos, sei fó paresér téknika ba alterasaun lei eleitorál ba Prezidente Repúblika kona-ba kompeténsia Supremu Tribunál ba Justisa (STJ) nian ne’ebé previstu iha lei eleitorál ba Prezidente Repúblika.

Notísia Relevante: Antes resesu, PN fó prioridade ba pakote lei eleitorál

Prezidente Tribunál Rekursu ko’alia asuntu ne’e relasiona ho alterasaun ba lei eleitorál tolu ne’ebé kompostu hosi alterasaun datoluk ba lei númeru 5/2006, 28 dezembru kona-ba órgaun administrasaun eleitorál, alterasaun dahuluk ba lei númeru 6/2016, 25 maiu kona-ba lei resensiamentu eleitorál no proposta-lei alterasaun daneen ba lei 7/2006, 28 dezembru, kona-ba lei eleitorál ba Prezidente Repúblika.

Iha loron-kuarta ne’e, Prezidente Tribunál Rekursu Deolindo dos Santos hala’o enkontru ho Prezidente Parlamentu Nasionál, Deputadu Aniceto Longuinhos Guterres Lopes, hodi diskute kona-ba alterasaun ba lei eleitorál ba Prezidente Repúblika.

“Ha’u mai ko’alia ho Prezidente Parlamentu Nasionál kona-ba diskusaun alterasaun ba lei eleisaun prezidensiál. Ami husu diskusaun ba diploma ne’e mais sedu posível, nune’e tempu ne’e labele badak liu. Tempu natoon iha audiénsia públika hodi rona entidade sira-nia hanoin. Hosi Tribunál Rekursu rasik sei fó hanoin tékniku balun, liuliu kompeténsia ne’ebé ke lei ne’e atribui ba Supremu Tribunál ba Justisa komesa hosi kandidatura ba eleisaun prezidensiál nian to’o ba atu proklama rezultadu eleisaun,” Prezidente Tribunál Rekursu Deolindo dos Santos, informa ba jornalista sira iha Parlamentu Nasionál, kuarta ne’e.

Prezidente Tribunál Rekursu ne’e labele esplika ho detalla kona-ba paresér téknika ne’e, tanba sei aprezenta uluk ba Komisaun A ne’ebé trata asuntu Justisa no Konstitusionál.

“Ne’e kestaun polítika. Sé mak bele deside ne’e Parlamentu Nasionál ho Governu. Se iha nesesidade entaun halo alterasaun. Se laiha nesesidade entaun labele. Maibé, desizaun atu halo ka la halo alterasaun ne’e, parte Parlamentu Nasionál nian,” nia dehan.

Notísia Relevante:  CNE hato’o paresér ba PN kona-ba pakote lei eleitorál tolu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here