Serimónia entrega ekipamentu GeNose C19 hosi Telkomcel ba DNASH. Imajen Telkomcel.

DILI, 09 juñu 2021 (TATOLI)—Kompañia Telin Timor-Leste (Telkomcel), oferese ekipamentu ho naran GeNose C19, hamutuk unidade rua ba Diresaun Nasionál Ambulánsia Serbisu Ospitalár (DNASH sígla portugés), Ministériu Saúde (MS).

Ekipamentu GeNose C19 ne’ebé prodúz hosi peskizadór Universidade Gajah Mada (UGM) Indonézia, sei utiliza hodi detekta virus COVID-19, ho lais, akuradu, barratu no mós sei fó benefísiu ba ema hotu.

Notísia relevante:Telkomcel entrega ventiladór rua ba Ministériu Saúde

“Ami espera ho ekipamentu GeNose C19 bele ajuda prosesu filtrajen prosesu screening, hodi detekta ho lais no bele haketak ema-sira ne’ebé saudavelmente no mós ho ema sira ne’ebé hetan infeksaun moras COVID-19,” Reprezentante Jestaun Telkomcel TL, Oscar Lúcio, hateten liuhosi komunikadu ne’ebé Tatoli asesu, kuarta ne’e.

Oscar Lúcio  konsidare prosesu ne’e di’ak tebes, hodi kria kondisaun seguru, konfortável no mós objetivu hodi oferese solusaun ba prevensaun COVID-19.

Iha esplikasaun hateten katak, GeNose C19 nia serbisu hodi detekta Volatile Organic Compound (VOC) hanesan formadu ida, tanba iha infeksaun COVID-19 ne’ebé sai hosi iis ba iha saku espesiál, depois prosesu sei kontinua identifika liuhosi sensor, nune’e dadus-sira ne’e sei prosesa ajuda hosi intelijénsia artificialmente (artificial intelligence).

Iha fatin hanesan Koordenadór Pilár VII COVID-19, Nilton do Carmo da Silva, apresia tebes ho inisiativa hosi kompaña Telkomcel no optimista katak, ekipamentu GeNose C19 bele ajuda Ministériu Saúde, hodi minimaliza transmisaun virus COVID-19 iha TL.

”Ami hato’o obrigadu ba Telkomcel ne’ebé ho konsistente oferese ona apoiu hodi suporta ami-nia serbisu liuliu hodi uza ekipamentu GeNose C19 ba prevensuan transmisaun virus
COVID-19,” Nilton do Carmo, hato’o obrigadu.

Ekipamentu GeNose C19 ida-ne’e entrega diretamente hosi reprezentante Jestaun Telkomcel Timor-Leste, Oscar Lucio, Jerente Corporate Communication, Billing Collection no Joana Miranda Jerente Entreprises Wholesale, no simu diretamente hosi Koordenadór Pilar VII COVID-19 Nilton do Carmo da Silva.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here