Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI, 09  juñu 2021 (TATOLI)–Diretór Ezekutivu Servisu Rejistu Verifikasaun Emprezariál (SERVE), Florêncio  Sanches, hateten, rejista ona kompañia foun partisipa iha atividade ekonómika sa’e 200%.

“Númeru empreza sira ne’ebé rejista foun hodi partisipa iha atividade ekonómika sa’e 200%, tanba ne’e SERVE haree pozitivu tebes iha trimestre dahuluk iha tinan ne’e,” Diretór Ezekutivu SERVE informa ba Agência TATOLI, via telefónika, kinta ne’e.

Nia esplika, partisipasaun empreza sira sa’e maka’as ho indikadór tanba Governu implementa programa rekuperasaun ekonómika hanesan Cesta Bázika no seluk tan.

Notísia relevante: Governu Prevee Millaun $50 ba Pakote Sosio-Ekonómiku

“Ida-ne’e ema barak protesta, maibé ita-nia emprezáriu sira responde pozitivu tebes, tanba ho polítika ida-ne’e maka halo númeru empreza rejista foun sa’e maka’as,” nia akresenta.

Indikadór seluk ne’ebé kontribui ba partisipasaun empreza maka atu sai benefisiáriu seguransa sosiál hodi partisipa programa sosiu-ekonómiku hosi Governu.

Notísia relevante: INSS rekolla dadus provizóriu “apoiu ba empregu” hamutuk 2.000-resin

Seluk tan maka sistema atendimentu SERVE via email no aumenta sukursál iha munisípiu.

“Ha’u hanoin indikadór sira ne’e maka kontribui númeru empreza foun sa’e makas, ne’e orgullu boot ba SERVE, tanba maski iha situasaun COVID-19 no inundasaun, maibé númeru empreza sa’e,” nia hatutan.

Reseita SERVE menus

Iha parte seluk tuir Diretór Ezekutivu SERVE, durante fulan neen nia laran iha tinan ne’e, reseita menus 50% tanba impaktu hosi COVID-19,” nia hatutan.

Maski nune’e, Dirijente ne’e garante katak sei la hamate espíritu emprezáriu sira atu halo atividade ekonómika.

“Hein katak tinan ne’e bele hetan resita di’ak filafali,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here