Sala julgamentu iha Tribunál Rekursu, Caicoli ne’ebé taka ba públiku. Foto Tatoli/Nelson de Sousa.

DILI, 09 juñu 2021 (TATOLI)—Tribunál Distritál Oe-cusse (TDO), kuarta ne’e, la konsege hala’o julgamentu vituál ba kazu pedofilia Topo-Honis, ne’ebé deskonfia envolve eis saserdote ida ho inisiál RD.

Arguidu RD ne’ebé akompañadu hosi advogadu, Miguel Acacio Farria iha sala julgamentu Trbunál Rekursu, Caicoli, la konsege rona pronunsiasaun ruma hosi Juiz koletivu ne’ebé prezide julgamentu hosi TDO liuhosi julgamentu virtuál, tanba iha fallansu tékniku balun.

Notísia relevante:Xanana Gusmão vizita eis-padre Richard Dascbach

“Julgamentu telekonferénsia ne’e iha fallansu tékniku oitoan iha mikrofone ne’ebé labele rona, nune’e labele kontinua hodi suspende fila-fali ba tuku 14:00 Otl,’’ Defeza, Miguel Acacio Farria, hateten ba jornalista-sira iha arredór Tribunál Rekursu, Caicoli, Dili.

Julgamentu ne’e mós taka ba públiku, inklui jornalista-sira, tanba tuir informasaun hosi defeza Miguel Acacio Farria, kazu ne’e envolve vítima balun ho menoridade. 

Tuir ajenda, julgamentu loloos atu rona deklarasaun arguidu-nian hosi vídeo konferénsia, ne’ebé hahú la’o ona, maibé ho problema tékniku, nune’e labele kontinua.

“Julgamentu antes ne’e, rona ona deklarasaun arguidu-nian ka prodús ona. Maibé, liu ona loron 30, nune’e prazu ba prova lakon, entaun presiza prodús fila-fali prova foun,’’ Advogadu Miguel Acacio Farria, ne’ebé fó asisténsia legál ba arguidu RD, haktuir.

Razaun julgamentu virtuál  

TDO tenke halo julgamentu virtuál liuhosi Tribunal Rekursu (TR), tanba arguidu importante ba kazu ne’e, nu’udár mós eis saserdote, ne’ebé labele halo dezlokasaun hosi Dili ba Oe-Cusse tanba situasaun serka sanitária no konfinamentu obrigatóriu iha situasaun surtu COVID-19.

Advogadu, ne’e mós konta tuir katak, arguidu RD la partisipa iha audiénsia julgamentu ne’ebé Tribunál marka iha 07 juñu, tanba la dezloka hosi Dili ba Oe-cusse, ho razaun kondisaun saúde no idade ne’ebé la permite atu halo viajen ho ró-ahi.

Antes ne’e, liu hosi julgamentu, rona ona deklarasaun arguidu no mós parte defeza ne’ebé hato’o pedidu ba Tribunal atu iha julgamentu tuir-mai, arguidu la presiza partisipa no bele reprezenta de’it hosi defeza.

Defeza lakohi kuarentena loron 14 iha Oe-cusse

Tuir loloos defeza partisipa julgamentu prezensiál ba kazu ne’e iha Tribunál Distritál Oe-cusse, tanba nia rasik iha ona teste swab ho rezultadu negativu inklui hetan ona autorizasaun hosi Sentru Integradu Jestaun Krize (SIJK), ho guia de marcha, maibé bainhira dezloka tiha ba Oe-cusse tenke kumpre tan kuarentena loron 14, tuir regra prevensaun COVID-19 autoridade RAEOA.

“Ida-ne’e mak regra ne’ebé prezudika tebes ita-nia serbisu. Ita hakarak aselera prosesu no pior liu ami hanesan advogadu, bainhira ami ba tiha Oe-cusse, tama tiha kuarente loron 14, sai-mai halo tan serbisu loron hira, entaun ami-nia serbisu barak iha Dili bele abandonadu, inklui bainhira sai hosi kuarentena prazu loron 30 ba julgamentu liu ona,” nia hateten.

Ho situasaun ida-ne’e maka, prezudika tebes serbisu advogadu-nian atu atende másimu direitu kliente-nian.

Nia hatutan, ho situasaun ne’e mak ikus-mai realiza de’it julgamentu liu hosi telekonferénsia, maibé julgamentu ne’e ladún efetivu, hodi defende direitu kliente, tanba prezudika tebes iha perguntas balun hosi Tribunál ho produkadór no deklarasaun balun ladún rona moos.

Maski ho situasaun ne’e, parte defeza kontinua kolabora ho justisa ka Tribunál, hodi hala’o julgamentu iha fatin ne’ebe de’it.

Nia konta tuir katak, iha 1 juñu defeza dezloka duni ba Oe-cusse, maibé tenke fila-fali mai Dili no la konsege partisipa iha audiénsia ne’ebé Tribunál marka iha 7 juñu.

“Ha’u mós hato’o pedidu ba autoridade atu halo auto-kuarentena, tanba antes ne’e iha ona akordu ho otél na’in atu selu rasik. Maibé, parte autoridade RAEOA mak deside fila-fali fatin auto kuarentena. Ida-ne’e mak laiha konkordánsia ba malu,” nia subliña.

Defeza haree katak, ho implementasaun serka sanitária prejudika tebes prosesu ne’ebé la’o, tanba desizaun iha nível sentrál ho rejionál kona-bá serka sanitária, ladún apar liga ba prosesu mobilizasaun.

Parte defeza kolabora ho justisa no hatudu boa fé atu halais prosesu ne’e, tanba ne’e nia husu ba autoridade presiza kria fleksibilidade hodi haree sirkunstánsia atu bele aselera prosesu.

Kazu ne’e deskonfia eis saserdote RD envolve iha krime pedofilia, pornografia no violénsia doméstika  iha orfanatu Topu-Honis, Oe-cusse iha tinan barak nia laran.

Prosesu julgamentu virtuál ne’e prezide hosi juíz koletivu, Yudi Pamungkas, Evangelino Belo, Hugo Pui no Ministériu Públiku reprezenta hosi Prokuradór, Matias Soares no arguidu hetan asisténsia legál hosi Advogadu Privadu Miguel Farria ho Pedro Aparicio Guterres.

Notísia relevante:COVID-19: RAEOA rejista pozitivu tolu no ativu lima

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here