Ofisiál Pilár II Ministériu Saúde, Bernadino Armando da Silva ho Reprezentante Komandante Jerál PNTL, Inspetór Jerál Superintendente Xefe, Carlos Jeronimo, esplika hela importánsia vasina doze daruak ba membru polisia sira, iha Sentru Formasaun Polísia, Comoro. Imajen/PNTL.

DILI, 09 juñu 2021 (TATOLI)—Ekipa Ministériu Saúde (MS), serbisu hamutuk ho Komandu Jerál Polísia Nasionál Timor-Leste (PNTL), hodi halo sosializasaun liuliu esplika kona-bá importánsia hosi vasina AstraZeneca daruak, ba membru polísia atu kontinua simu hodi hasa’e imunidade.

Ofisiál Pilár II Ministériu Saúde, Bernadino Armando da Silva, hateten sosializasaun ne’e atu fahe informasaun kona-bá vantájen hosi vasina doze daruak ne’ebé membru PNTL presija atu kompleta.

Notísia relevante:Ema 93.525 simu ona vasina AstraZeneca doze dahuluk

Parte MS konsidera sensibilizasaun ne’e importante tanba ohin loron iha informasaun oioin, ne’ebé ema lansa iha média sosiál, liuliu informasaun falsa-sira (hoax), ne’ebé halo ema barak trauma.

“Ita akompaña iha média sosiál, ema-nia kompreensaun ladún sinkroniza ho teoria. Tanba ne’e mak ami mai sosializa kona-bá vantajen hosi vasina doze daruak nian ne’ebé membru PNTL-sira sei simu iha tempu besik,” Bernadino Armando da Silva, hateten ba jornalista-sira iha Sentru Formasaun Akadémika, Comoro, kuarta ne’e.

MS mós konsidera membru PNTL-sira nu’udár forsa ida ne’ebé ajuda ekipa médiku-sira hodi hala’o serbisu iha liña frente, presiza konsumu informasaun diak barak hodi labele dúvida, bainhira sosializa informasaun ba sosiedade kona-bá simu vasina.

“PNTL iha papél boot atu fahe tutan informasaun ne’e ba membru-sira, nune’e iha hanoin hanesan kona-bá implementasaun vasina ne’e rasik iha territóriu tomak,”nia subliña.

Ekipa MS esforsu nafatin  iha aspetu komunikasaun no advokasia, hodi hametin no hasa’e ema-nia konsiénsia hodi foti desizaun ba nia an atu simu vasina.

Iha fatin hanesan, reprezentante Komandante Jerál PNTL, Inspetór Jerál Superintendente Xefe, Carlos Jerónimo, konsidera sosializasaun ne’e di’ak, hodi konvense membru-sira atu hola parte iha vasina doze daruak.

“Ita hirak ne’ebé mai reprezenta departamentu ka komandu ida-idak, bele fahe tutan informasaun ba membru-sira seluk, nune’e ita hotu-hotu bele kontinua vasina doze daruak,” nia husu.

Komandante ne’e ekoraza membru-sira atu simu vasina daruak, tanba bele halo movimentu livre iha territóriu nasionál no la liu hosi swab teste bazeia ba deklarasaun Governu.

Tuir dadus, totál membru PNTL efetivu hamutuk 4000-resin no iha 60% mak tuir ona vasina doze dahuluk.

Tuir planu, Governu sei lansa vasina AstraZeneca doze daruak iha 14 juñu.

Programa sensibilizasaun ne’e partisipa hosi segundu Komandante munisípiu Dili, Euclides Belo, Xefe Rekursu umanu, Xefe Relasaun Públika, Xefe Polkom, ofisiál Superiór-sira, Sarjentu no Ajente-sira.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here