Ministru Koordenadór Asuntu Ekonómiku, Joaquim Amaral. Imajen TATOLI/Egas Cristóvão

DILI, 09 juñu 2021 (TATOLI)-Ministériu Koodenadór Asuntu Ekonómiku (MKAE), Joaquim Amarál, informa, hafoin simu reklamasaun hosi konsumidór sira, fó instrusaun ba Autoridade Inspesaun no Fiskalizasaun Atividade Ekonómika no Sanitária (AIFAESA) hodi halo inspesaun ba loja sira iha kapitál Dili inklui munisípiu seluk.

“Ami halo koordenasaun ho AIFAESA hodi halo inspesaun, ne’ebé hetan duni loja balun fa’an sasán nesesidade bázika no materiál konstrusaun ho folin a’as, ne’ebé hahú prosesa ona tuir dalan legál,” Ministru Joaquim hateten ba Agência TATOLI, iha edifísiu Ministériu Finansa (MF), Aitarak-laran, kuarta ne’e.

Notísia relevante: Folin foos iha Baucau hahú sa’e ba $15.50 centavos

Iha inspesaun ne’e, autoridade deteta negosiante balun hasa’e folin la tuir tabela ne’ebé Governu fó sai ona.

Tanba ne’e, Governu liuhosi MKAE no AIFAESA sei haree tuir tabela, hodi difini grau violasaun presu sasán.

“Ita haree bainhira vioalasaun ne’e grave, ita sei haruka prosesu tuir dalan legál ka ba Ministériu Públiku, maibé kuandu violasaun mínimu, ita fó sansaun ou haruka selu koima,” nia akresenta.

Nune’e, governante ne’e husu ba emprezáriu ka loja na’in sira atu labele aproveita situasaun kalamidade hodi hasa’e folin sasán hodi difikulta povu kiik sira.

“Ha’u husu ba kompañia sira atu tane resposabilidade hodi kontribui ba estabilidade ekonómika, liu-liu fa’an sasán tuir padraun ne’ebé Governu fó sai ona,” nia enkoraja.

Iha 19 maiu, peskiza no observadór Core Group Transparency-Timor Leste (CGT-TL) hamutuk ho nia membru Mata Dalan Institute (MDI) ba munisípiu neen, ne’ebé aplika Serka Sanitária  hatudu katak afeta ba folin nesesidade bázika hodi fó impkatu negativu ba sosiedade.

Munisípiu sira ne’e mak hanesan Baucau, Lautém, Covalima, Aileu, Ermera no Bobonaro.

Enkuantu, loja konstrusaun balun iha Dili mós rekoñese folin materiál konstrusaun hanesan besi beton, kalen no sementu sira folin sa’e maka’as tanba kustu transportasaun hosi Indonézia.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here