Fakuldade Siénsia Sosiál, UNTL. Imajen/Espesiál
Edifísiu Fakuldade Siénsia Sosiál, UNTL. Imajen/Espesiál

DILI, 09 juñu 2021 (TATOLI)-Ministériu Finansa (MF) klarifika relasiona atrazu pagamentu saláriu ba dosente part-time hamutuk 70 resin no funsionáriu kazuál 30 resin iha Universidade Nasionál Timor-Lorosa’e (UNTL) tanba alokasaun menus.

“Ministériu Finansa klarifika katak, atrazu pagamentu ne’e tanba alokasaun orsamentu UNTL iha kategoria bens no servisu la sufisiente atu uza selu saláriu dosente part-time no funsionáriu kazuál hirak ne’e, ne’ebé kestaun ida-ne’e hanesan ezersísiu interna no jestaun universidade rasik hanesan ajénsia autonómu ida,” refere nota hosi MF ne’ebé Agência TATOLI asesu, iha kuarta ne’e.

Atu rezolve asuntu ne’e, iha loron 29 marsu 2021, Diresaun Nasionál Planu no Finansa (DNPF) UNTL prepara justifikasaun pedidu alterasaun orsamentu ne’ebé hetan aprovasaun husi Reitór universidade ne’e rasik, hodi submete ba Unidade Planeamentu, Monitorizasaun no Avaliasaun (UPMA) iha Gabinete Primeiru-Ministru.

“Pedidu ne’e, parte UNTL submete ona ba UPMA iha loron 14 abríl 2021, hodi halo análiza téknika ba planu programa no atividade (la’ós orsamentu) iha loron ida de’it no loron tuir mai hato’o pareser no konsidera alterasaun orsamentu ne’e, ne’ebé rekomenda universidade ne’e atu prosesa pedidu refere hodi submete ba Diresaun Jerál Planeamentu no Finansa (DJPO, sigla portugés), Ministériu Finansa,” nota hosi MF esplika.

DJPO simu dokumentu hosi UPMA iha loron 16 abríl no iha loron ne’e kedas, ekipa hahú halo verifikasaun no kontrolu.

“Hosi ezersisiu ne’e, ekipa DJPO identifika katak formatu alterasaun orsamentu ne’ebé mak UNTL submete, la tuir tipu formatu própriu konforme previstu iha dekretu Governu númeru 1/2021, 8 janeiru, kona-ba Alterasaun Orsamentál. Tanba ne’e, ekipa komunika ba parte téknika UNTL atu kurije no formaliza formatu hodi separa tuir nia tipu alterasaun orsamentu,” nota MF subliña.

Ezersísiu ne’e hanesan parte ida hosi MF no UNTL hanesan ajénsia autonómu nia kumprimentu ba regra no prosedimentu sira ne’ebé mak vigora, hafoin universidade ne’e submete formatu alterasaun orsamentu loloos iha fulan-abríl nia rohan, ekipa DJPO identifika nafatin iha erru lubun ida, liu-liu iha kódigu atividade, objetu ka fatin no montante annuál hosi verba orsamentu, tanba ne’e ekipa DJPO komunika ba DNPF, UNTL atu hadi’a no submete filafali.

Nune’e, hafoin halo koreksaun finál ba dala-tolu, ekipa DJPO hosi MF simu dokumentu versaun finál iha loron 02 juñu 2021 no kontinua halo verifikasaun dokumentu no kontrolu.

Dokumentu ne’e hetan aprovasaun finál iha sistema Government Resource Planning (GRP) iha loron 04 juñu 2021, ba voucher tol no voucher ida tan, ne’ebé aprova iha loron 07 juñu 2021 tanba UNTL sei rezolve erru ho UPMA, relasiona ho balansu ne’ebé la sufisiente.

Prosesa pagamentu juñu nia laran

Iha loron 07 juñu, MF kontaktu parte DNPF, UNTL no husu atu hahú kria Commitment Payment Voucher (CPV) ba dosente part-time no funsionáriu kazuál sira, atu nune’e DNPF UNTL bele prosesa pagamentu saláriu.

Iha loron tuir mai, ekipa hosi DNPF, UNTL hala’o enkontru ho Diresaun Jerál Tezouru (DJT), MF atu haree oinsá bele evita atrazu pagamentu  iha futuru.

Iha reuniaun ne’e, parte DNPF konkorda atu submete dokumentu kompletu mai MF, atu nune’e bele hahú prosesa pagamentu iha fulan-juñu nia laran.

“Ministériu Finansa hakarak akresenta katak 75% hosi prosesu ezekusaun orsamentu desentraliza ona ba iha liña ministériu sira no prosesu ezekusaun orsamentu ne’e, 25% de’it mak envolve MF, liuliu iha parte verifikasaun dadus no pagamentu. Tanba ne’e, kada liña ministériu sira tenke ezekuta ninia orsamentu tuir programa no atividades aprovadu,” nota MF esklarese.

Enkuantu, ba munisípiu no ajénsia autonómu sira inklui UNTL, prosesu ezekusaun orsamentu  desentraliza ona 100%.

“Signifika katak, munisípiu no ajénsia autonómu sira, inklui UNTL rasik mak ezekuta sira-nia orsamentu no realiza pagamentu sira diretamente ba iha konta bánkaria benefisíariu, exeptu saláriu no vensimentu,” refere nota ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here