Membru PNTL hala’o patullamentu tama-sai bairru iha Dili, hodi asegura komunidade iha situasaun serka sanitária, kuarta (12/05/21). Imajen Tatoli/António Gonçalves.

DILI, 09 maiu 2021 (TATOLI)—Konsellu Superiór, Polísia Nasionál Timor Leste (PNTL), liu hosi avaliasaun jerál, iha kuarta ne’e, konsege diskute kona-bá mekanizmu utilizasaun arma iha instituisaun seguransa ne’e.

“Membru Konsellu Superiór PNTL halo avaliasaun no diskute mós kona-bá mekanizmu utilizasaun arma ho kuidadu tuir lei instituisaun-nian,” Portavóz PNTL, Superintendente Xefe, Arnaldo de Araújo, hateten ba jornalista-sira, iha Caicoli, hafoin avaliasaun.

Notísia relevante:Kazu Lahane, arguidu tama prizaun preventiva

Portavóz PNTL ne’e esplika, Komandu Jerál husu atu komandu PNTL munisípiu-sira halo kontrolu makaas ho rigorozu ba membru-sira atu bainhira serbisu remata, tenki rai arma iha armazén insituisaun-nian, no la presiza lori ba uma.

Nia hatutan,  Komandante Jerál hamutuk ho Konsellu Superiór PNTL, levanta mós kestaun ne’e iha avaliasaun jerál ne’e tanba, liga ho kazu ne’ebé akontese iha aldeia Ainitas-hun, suku Lahane Osidentál, envolve membru polísia MJ ne’ebé uza arma hodi tiru mate Mateus de Deus ho oan mane Camilio de Deus, inklui hakanek vítima ida-seluk, iha sábadu (05/06/21) madrugada.

Nune’e, Komandu mós orienta hodi halo ona investigasaun kle’an ba MJ ho família, no oras ne’e hein de’it desizaun hosi Tribunál.

“Prosesu la’o hela, bainhira iha ona desizaun, PNTL sei foti desizaun hodi halo demisaun ba membru ne’e,” Arnaldo de Araújo hateten.

Antes ne’e, Provedoria Direitu Umanu no Justisa (PDHJ sígla portugés), husu ona ba Komandu Jerál PNTL, atu kumpre regra utilizasaun arma, tuir despaixu nº 290/CG-PNTL/IX/2016.

Iha rekomendasaun ne’e hateten katak, PNTL presija kumpre no implementa norma ba uza arma iha PNTL, hanesan despaixu nº290/CG-PNTL/IX/2016, pontu b, proibidu ka labele lori ka utiliza arma bainhira la hala’o serbisu polísia-nian, iha tempu folga, feriadu, lisensa saida de’it, tuir kursu, moras, partu etc, no pontu f kona-bá dezlokasaun serbisu bele utiliza arma bainhira iha órden serbisu, ne’ebé klaru hosi nia-Komandante ho asuntu serbisu polísia-nian.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here