Diretór Eskola Ensinu Báziku Sentrál  (EBC, sigla portugés), Hera, João Reis da Cruz. Imajen Tatoli/Tomé Amado

DILI, 09 juñu 2021 (TATOLI) – Konselho dos Profesores hosi Eskola Ensinu Báziku Sentrál (EBC),Hera, Dili,  deside  realiza teste sumativu (Summative Test) ba estudante 841 bainhira prosesu ensinu aprendizajen re-ativa fali.

Notísia Relevante : Estudante 841 iha EBC Hera seidauk hetan kaderneta

Teste sumativu (summative test), nu’udar teste ne’ebé hala’o hafoin finaliza tiha matéria eskola nian balun. Iha eskola-sira, teste ne’e koñesidu hanesan teste jerál (ulangan umum).

Daudaun  profesór-sira iha EBC Hera distribui de’it rezumu matéria ba alunu-sira atu estuda iha uma tanba kumpre hela serka sanitária no konfinamentu obrigatóriu.

Diretór eskola EBC Hera, João Reis da Cruz,  informa sira la halo teste formativu hanesan eskola sira seluk halo bainhira distribui rezumu matéria ba alunu-sira ho kedan pergunta lubuk ida atu estudante sira prienxe.

“Ami nia rezumu matéria ne’ebé distribui ba alunu-sira ne’e laiha pergunta. Ami fó de’it matéria ba sira atu estuda depois prosesu aprendizajen aula prejensiál hahú ona mak ami sei realiza teste sumativu ba sira,” João Reis da Cruz  informa ba Agência Tatoli iha edifísiu Ministériu Edukasaun, Juventude no Desportu (MEJD), Vila Verde, Dili, kuarta ne’e.

Nia dehan durante  janeiru-fevereiru, eskola realiza ona aula prejensiál ba alunu 841 ho maneira SEMAN (sim seman não). Signifika eskola fahe alunu sira ba grupu rua; grupu dahuluk tama semana ida depois feriadu tiha, grupu segundu tama fali. Maneira ida ne’e eskola utiliza tanba kumpre desizaun Governu nian atu prevene-an hosi pandemia COVID-19.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here