Edifisiu Tribunál Distritál Dili. Imajen/TATOLI

DILI, 09 juñu 2021 (TATOLI)—Tribunál Distritál Dili (TDD), foti ona desizaun ikus iha kuarta ne’e, hodi kondena arguidu Lourenço Haulobo ho pena únika prizaun tinan 23.

Pena únika ne’e tanba arguidu komete kazu omesídiu agravadu, hamate Domingas Soares, inan hosi Lim di Moy, ne’ebé akontese iha rezidénsia Rai Kotu, aldeia Tera Santa, suku Madohi, postu administrativu Dom Aleixo, munisípiu Dili, iha 30 outubru 2020.

Notísia relevante:Kazu Raikotu, MP alega pena prizaun tinan 28 ba arguidu

Tuir entendimentu Tribunál nian, bazeia ba produsaun prova liu hosi julgamentu-sira liu-bá, hatudu faktu ne’ebé aprezenta hosi Ministériu Públiku (MP), no deklarasaun lezada ho sasin ba faktu-sira provadu hotu katak, momentu ne’eba bainhira lezada Lim di Moy ko’alia hela telefone ho-nia kolega derrepente rona arguidu la’o ba mai iha aredór uma-nian, iha kalan boot ka’er ho tudik.

Hafoin lezada sai-mai haree arguidu,  nune’e lezada  hakilar, na’ok ten, hodi hada’u-malu tudik ho arguidu, rezulta lezada-nia liman hetan kanek.

Bainhira lezada hetan kanek, lezada nia-inan Domingas Soares hakarak atu salva maibé arguidu sona kedan matebian iha hirus-matan.

Tuir rezultadu autopsia hatudu  arguidu sona matebianiha parte kakorok, kuak tolu, kalilin-okos no  kotuk-laran hodi rezulta vitíma mate fatin.

“Tanba ne’e Tribunál haree akuzasaun MP ba krime tolu provadu hotu no laiha duvída,’’ Juiza Maria Solana, pronunsia iha leitura desizaun iha sala audénsia TDD, kuarta ne’e.

Krime tolu ne’e mak hanesan omesídiu agravadu, omisídiu ho forma tentadu, previstu iha artigu 139 iha kódigu penál Timor-Leste,  ho  arma branka, nune’e Tribnál aplika pena únika tinan 23 ba arguido no Tribunál mós absolve arguidu hosi selu kustu judisiál.

Tuir regra prosesuál ho desizaun Tribunál-nian  dentru loron 15 hosi despaixu Tribunál, parte defeza la satifás ho desizaun bele halo rekursu.

Audiénsia julgamentu ne’e prezide hosi juíz koletivu Maria Solana, Ana Paula no Juiz Ivan Antónino, Ministériu Públiku, reprezenta hosi prokuradór Jacinto Babo, no arguidu hetan asisténsia legál hosi defensór Públiku, Estaqui Guterres.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here