Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI, 09 juñu 2021 (TATOLI)–Diretór Ezekutivu Servisu Rejistu Verifikasaun Emprezariál (SERVE), Florêncio Sanches, informa, hahú hosi janeiru to’o juñu, pedidu kompañia taka atividade negósiu tun kompara ho tinan kotuk.

“Ita-nia dadus pozitivu tebes, kompañia ne’ebé hatama pedidu taka kompañia tun maka’as, hosi janeiru pedidu ofisiál hamutuk 12, iha fevereiru kompañia lima, marsu tolu, abríl to’o maiu laiha no agora iha juñu foin mak ida,” Diretór Ezekutivu informa ba Agência TATOLI, via telefónika, kuarta ohin.

Nia dehan, kompañia 21 ne’ebé atu taka aktividade ekonómika, maioria kompañia internasionál.

“Sira ne’ebé deside taka kompañia, maioria hanesan estrajeiru ne’ebé durante ne’e halo atividade ekonómika iha Timor-Leste. Sira taka tanba situasaun daudaun ne’ebé ita infreta, halo kompañia menus rendimentu, tanba ne’e sira deside taka, enkuatu ita-nia empreza lokál ne’ebé taka atividade ekonómika hosi médiu no pequena empreza sira,” nia akresenta.

Tuir Dirijente ne’e, ho númeru ne’ebé tun, kompañia sira hahú la’o tuir dalan pozitivu, kompara ho númeru ne’ebé deside taka atividade ekonómika iha tinan kotuk.

Biban ne’e, Diretór Ezekutivu SERVE, kontinua husu ba kompañia sira atu labele taka atividade iha situasaun COVID-19, maibé kuandu rendimentu menus, bele suspende atividade ekonómika temporáriamente to’o hein situasaun normál mak foin halo funsaun hanesan bain-bain.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here