Pesoál Saúde prepara fó vasina AstraZeneca ba sidadaun iha Sentru Saúde Internamentu Vera Cruz. Imajen TATOLI/Francisco Sony

DILI, 09 juñu 2021 (TATOLI)–Ministru Prezidénsia Konsellu Ministru, Fidelis Manuel Leite Magalhães, hateten, bainhira populasaun iha Dili maioria simu ona vasina, maka Governu deside deklara normalidade, ne’ebé sei termina Serka Sanitária no Konfinamentu Domisiliáriu, nune’e atividade ekonómika bele la’o ho di’ak.

Atu atinje meta ne’e, tuir Ministru presiza parte hotu ninia kolaborasaun, liu-liu autoridade lokál nia papel implementasaun vasina.

Notísia relevante: PM husu autoridade lokál partilla importánsia vasina ba komunidade

“Populasaun Dili simu vasina hamutuk 40%, maibé atu aumenta ritmu atinje 80% di’ak tebes no bele dehan fulan oin (jullu) bainhira Konsellu Ministru halo avaliasaun ba situasaun, ita lalika preokupa ho desizaun forte hirak ne’ebé maka sei impede atividade loron-loron. Tanba ne’e, apela komunidade hotu atu hakat ba sentru vasina simu vasina tanba ho nune’e ita bele normaliza filafali situasaun iha rai laran, atividade ekonómika, atividade desportivu no sira seluk,” Ministru Fidelis hafoin reuniaun Konsellu Ministru (KM) iha Salaun Auditóriu Ministériu Finansa (MF), Aitarak-laran, kuarta ne’e.

Nune’e, Portavóz Governu husu ba komunidade atu lalika fiar informasaun falsa sira ligadu ho vasina, tanba informasaun sira ne’ebé ema lansa ne’e bosok tanba Organizasaun Mundiál Saúde (OMS) hato’o katak vasina maka dalan di’ak liu hodi proteje sidadaun hosi COVID-19, tanba ne’e kuandu la vasina maka sei iha risku boot ba nasaun no sosiedade tomak.

Funsionáriu Estadu tenke sai ezemplu simu vasina

Biban ne’e, Governu mós ezije ba funsionáriu Estadu atu sai ezemplu iha esforsu simu nasional vasinasaun.

“Funsionáriu administrasaun públika atu sai ezemplu hodi simu vasina tenke hatudu ezemplu iha publiku, nune’e hatuur konfiansa iha komunidade nia le’et katak vasina ne’e importante tebes ba nasaun nia esforsu atu normaliza hikas situasaun iha rai-laran. Tanba ne’e tenke simu vasina maka bá serbisu,” governante ne’e dehan.

Nia akresenta, daudaun ne’e stock vasina hamutuk 200.000, ne’ebé apoia hosi Nova Zelándia no COVAX Facility.

“Vasina 200.000 ne’ebé mak daudaun iha, hanesan informasaun di’ak ba ita no sente kama’an oituan ho situasaun ida ne’e tanba ita hetan apoia vasina barak. Vasina ne’e la’ós ita de’it mak simu, maibé nasaun sira ne’ebé mak apoiu mai ita iha sia mós vasina tanba sira hatene vasina ne’e di’ak no imposível sira hamonu fali sira-nia kredibilidade,” nia hatutan.

Notísia relevante: Ema 93.525 simu ona vasina AstraZeneca doze dahuluk

To’o loron 08 juñu, ema hamutuk 93.525 iha territóriu maka simu ona vasina doze dahuluk kontra COVID-19, ne’ebé reprezenta 12% hosi populasaun ho tinan 18 ba leten.

Iha Dili ne’ebé hanesan munisípiu ne’ebé afetadu liu surtu COVID-19, doze dahuluk fó ona ba ema hamutuk 80.948, ne’ebé reprezenta 40% hosi populasaun ho tinan 18 ba leten iha munisípiu ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here