Vise-Prezidente Country Coordination Mechanism (CCM-TL) Fundu Global Timor-Leste, Filipe da Costa. Imajen/Espesiál

DILI, 09 juñu 2021 (TATOLI)-Fundu Global liuhosi COVID-19 Response Mechanism, tersa (08/06), aprova montante orsamentu $1.169,591 hodi apoiu Governu Timor-Leste responde no mitigasaun imediata ba propagasaun COVID-19.

“Iha Fast-Track Funding Request ne’e, CCM-TL submete proposta iha loron 21 maiu ba Fundu Global, no sira aprova montante osan ne’e iha loron 8 juñu, hodi uza atu kompras sasán hodi responde propagasaun COVID-19, inklui mákina GeneExpert hodi teste rezultadu Polymerase Chain Reaction (PCR) COVID-19 nian, ekipamentu protesaun pesoál, no halo manutensaun ba ekipamentu laboratóriu nasionál nian,”  Adjuntu Prezidente Country Coordination Mechanism (CCM-TL) Fundu Global Timor-Leste, Filipe da Costa, esplika liuhosi komunikadu imprensa ne’ebé Agência Tatoli asesu, kuarta ne’e.

Nia dehan, orsamentu ne’ebé alokadu mai Governu Timor-Leste ne’e responde Mekanizmu COVID-19 ba proposta Fast-Track Funding Request no hodi responde nesesidade urjente produtu saúde nian ba COVID-19 ne’ebé sei uza ba intervensaun ba kontrola no kontensaun COVID-19 nian, inklui kompras sasán ekipamentu protesaun pesoál, re-inforsa xave ba aspetu sistema saúde hanesan laboratóriu.

“Orsamentu $1.169,591 aprova ona, no ami (CCM-TL) informa ona ba Ministériu Saúde nu’udar resipiente dahuluk atu sira prepara ona ba sira-nia planu ezekusaun ba orsamentu Fast-Track Request nian hodi kompras imediata sasán ba nesesidade COVID-19 nian. Orsamentu ne’e ajuda tebes Governu Timor-Leste hodi hasa’e volume serbisu protesaun nian, no hasa’e kapasidade laboratóriu nasionál hodi prodús imediata rezultadu teste PCR iha futuru,” adjuntu prezidente CCM-TL, Filipe da Costa hateten.

Administradór Fundu Global iha Ministériu Saúde, Noe Gaspar Pinto da Silva hateten, aprovasaun proposta Fast-Track Funding Request hosi Fundu Global, ho montante  $1.169,591.00, Ministériu Saúde liu-liu divizaun implementasaun fundu globál hahú halo ona planu ezekusaun hodi responde imediata ba fundu ne’e.

“Ita halo ona kompras online liuhosi sítiu wambo.org ba nesesidade urjente hodi responde propagasaun COVID-19, inklui mákina GeneExpert hodi teste no fó sai imediata rezultadu PCR COVID-19 nian, ekipamentu protesaun pesoál, no halo manutensaun ba ekipamentu laboratóriu nasionál,” nia dehan.

Administradór Noe reafirma katak, planu ezekusaun ba orsamentu refere ho kategoria fast-track, nune’e Ministériu Saúde sei ezekuta dentru  juñu no jullu-nia laran tanba prosesu akizisaun hahú horisehik liuhosi portal online, no sasán hotu sei to’o iha Timor-Leste iha loron ikus fulan jullu nian hodi responde ba propagasaun COVID-19 nian.

Timor-Leste estabelese relasaun traballu ho Fundu Global hodi luta kontra HIV/SIDA, Tuberkulozu no Malária, no implementa fundu hosi Global Fund ne’e dezde 2003.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here