Uma ne’ebé ahi-han iha aldeia Lepgen, suku Tapo-memo, postu administrativu Maliana, tersa (08/06). Imajen Tatoli/ Sérgio da Cruz.

BOBONARO, 09 juñu 2021 (TATOLI)—Dioseze Maliana, apoia $1.000 ho sasan nesesidade bázika ba família ida iha aldeia Lepgen, suku Tapo-memo, postu administrativu Maliana, ne’ebé ahi han-mutuk uma, iha tersa (08/06).

Pároku, Parókia Santa Cruz Maliana, Padre Valério Gumão, hateten apoiu ne’e hanesan solidariedade hosi Dioseze ba sarani-sira, liuliu vítima ba inséndiu ne’e atu bele responde nesesidade lor-loron, tanba sasan ahi han totál.

Notísia relevante:Don Norberto deside reativa fali misa iha Dioseze Maliana

“Apoiu ne’e hosi Amu Bispu Maliana. Ne’e hanesan solidariedade ida tanba vítima-nia sasan la konsege salva,” Padre Valério Gumão, hateten iha Parókia Santa Cruz, Maliana, kuarta ne’e.

Pároku ne’e observa ona kondisaun uma ne’ebé ahi han, no dioseze hamutuk ho parókia Santa Cruz Maliana, sei hala’o enkontru ho família, atu bele konstrui hikas uma ba vítima iha tempu badak.

Padre Valério dehan, sei konvoka mós enkontru ho grupu kategoria-sira iha Parókia ne’e, oinsá bele ajuda-malu nune’e bele harii duni uma ne’e.

Sasan nesesidade bázika ne’ebe dioseze oferese ona mak hanesan bikan fatuk 12, super mie kaixa rua, sanan rua, sponza ida, tasu hitu, lona rua, sabaun no seluk tan, tanba antes ne’e Cruz Vermela Timor-Leste (CVTL) filiál Maliana mak oferese ba dioseze, no komunidade ne’ebé hela besik mak oferese roupa.

Vítima, Gorreti Ivete Gouveia, agradese ba Bispu Dioseze Maliana, Dom Norberto do Amaral  ne’ebé ho laran luak la haluha nia sarani-sira iha tempus usar hodi oferese apoiu atu bele rekopera situasaun ida ne’e.

“Ami agradese ba Amu-sira ne’ebé ajuda ona ai-han no sasan uza nian, tanba ami laiha ona kbiit atu sosa. Agradese mós ba ema hotu ne’ebé apoia ona ami,” Gorreti Ivete Gouveia  agradese iha fatin akontesimentu.

Vítima konta-tuir katak, sasan uma laran la konsege salva hotu, inklui osan $5.000 ne’ebé tuir planu sei uza atu konstrui uma ne’ebé didin de’it ho piku.

Dadus ne’ebé jornalista rekolla iha terrenu, inséndiu ne’e akontese kauza hosi sirkuitu  eletrisidade, no komunidade intervein kedan, maibé la konsege salva tanba ahi lakan makaas liu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here