Ministru Justisa, Manuel Cárceres da Costa. Imajen Tatoli/Egas Cristovão.

DILI, 09 juñu 2021 (TATOLI)—Ministru Justisa (MJ), Manuel Cárceres da Costa, orienta ona funsionáriu ne’ebé ho kargu xefia, hodi halo arollamentu kona-bá prosesu deklarasaun riku-soin no bens interese, tuir notifikasaun hosi Komisaun Anti-Korrupsaun (CAC sígla portugés).

“Notifikasaun hosi CAC ha’u hato’o ona despaixu ba diretór jerál ida-idak atu halo arrolamentu, hodi kumpre lei no ajuda CAC hala’o serbisu,’’ Manuel Cárceres, hateten ba jornalista Agência Tatoli iha Caicoli, kuarta ne’e.

Notísia relevante:Deklara riku-soin, CAC hahú arrolamentu ba kargu xefia

Manuel Cárceres informa, MJ iha Diretór Jerál tolu, inspetór  ida, diretór sanulu no xefe departamentu lubuk ida.

Nune’e, nia husu ona ba diretór jerál ida-idak hodi koordena diretór no xefe departamentu-sira atu halo arrolamentu, hodi hein prosesu deklarasaun tuir-mai.

Governante ne’e konsidera, lei foun Medida Prevensaun no Kombate Korrupsaun (MPCC sígla portugés), iha artigu ne’ebé prevee kona-bá deklarasaun riku-soin, importante tebes ba  Estadu atu bele kontrola funsionáriu ne’ebé asume kna’ar iha instituisaun Estadu.

“Ezemplu bele kontrola funsionáriu ida ne’ebé ohin sai xefe departamentu, antes ne’e ba serbisu sa’e mikrolete, maibé foin fulan tolu sosa ona karreta prado. Ida-ne’e Estadu kestiona, osan ne’e foti hosi ne’ebé,” nia fó ezemplu.

Ho prezensa lei ne’e, MJ fiar katak, sei kontrola diak liu-tán oinsa presta serbisu ho onestidade no labele monu ba tentasaun oi-oin hanesan prátika korrupsaun.

Iha 14 maiu, CAC  hasai notifikasaun iha nível ministériu, sekretária Estadu to’o autoridade munisipál hamutuk 66 no iha semana hirak liu-bá,  CAC hato’o tán notifikasaun ba instituisaun autónoma besik 25 ba prosesu arrolamentu ne’e.

Prosesu arrolamentu dadus pesoál ne’ebé instituisaun ida-idak sei aprezenta relatóriu informasaun, nune’e CAC hahú efetua serbisu ba instituisaun hira mak arroladu, hodi sujeita halo deklarasaun.

Tanba ne’e, sei halo arrolamentu ba dadus pesoál hosi instituisaun hotu-hotu, hafoin define mapeamentu instituisaun hira mak aplika uluk hodi deklara riku-soin.

Lei númeru 7/2020, 26 agostu kona-bá Medida Prevensaun no Kombate Korrupsaun (MPKK) tama ona iha vigór, iha 22 fevereiru 2021.

Lei MPKK prevee iha kapitulu II Regime de Declaracão de Rendimentos, Bens e Interesses hosi artigu 27 to’o artigu 58.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here