Pasaporte komún Timor-Leste. Imajen/google

DILI, 09 juñu 2021 (TATOLI)—Ministériu Justisa (MJ), adia estabelesimentu ba atendimentu emisaun passaporte eletróniku iha nasaun tolu hanesan Portugál, Reinu Unidu ho Koreia Súl, ne’ebé tuir loloos atu realiza iha tinan ne’e, tanba situasaun COVID-19.

“Loloos iha tinan ne’e hahú estabelese ona iha nasaun tolu ne’e, maibé ho situasaun COVID-19 labele realiza. Tanba ne’e ita tau nafatin iha planu tinan oin,’’ Ministru Justisa, Manuel Cárceres da Costa, hateten ba jornalista Agéncia Tatoli, iha Caicoli, tersa ne’e.

Notísia relevante:Governu Lansa Emisaun Pasaporte Eletróniku ba Munisípiu-10

Inisiativa atu loke tan emisaun passaporte eletrónika, tanba timoroan barak mak buka moris iha nasaun hirak-ne’e, nune’e fasilita sidadaun-sira emite inklui halo renovasaun pasaporte.

Parte Ministériu Justisa mós diskute ona asuntu ne’e ho parte Ministériu Negósiu Estranjeiru no Kooperasaun (MNEK), atu trata hamutuk asuntu ne’e.

Tuir Ministru Justisa katak, molok estabelesimentu, presiza kompleta lejizlasaun balun no presiza serbisu hamutuk ho MNEK, hodi halo diplomasia ho embaixada Timor-Leste nian iha nasaun hirak ne’e.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here