Sekretáriu CCLN munisípiu Baucau, Manuel 'Alari' da Costa Soares. Imajen TATOLI/Natalino Belo

BAUCAU, 09 Juñu 2021 (TATOLI)–Konsellu Kombate Libertasaun Nasional Baucau (CCLN, sigla portugés) munisípiu Baucau liuhosi Sekretáriu, Manuel ‘Alari’ da Costa Soares, hateten Governu presiza revee filafali medida Serka Sanitária ne’ebé fo impaktu ba setór ekonomia no edukasaun.

“Konsellu Veteranu liuhosi enkontru, husu atu Governu haree filafali mekanizmu foun hosi implementasaun Serka Sanitária, ne’ebé ami sempre hateten katak ita fortifika iha sosializasaun prevensaun COVID-19 ba povu, hahú hosi aldeia, suku, no uma-kain, kona-ba maneira halo prevensaun, hanesan distánsia sosiál, uza mákara, fase liman no seluk tan,” Sekretáriu CCLN hateten ba Agência TATOLI, iha edifísiu Konsellu Veteranu, iha Villa antiga Baucau, kuarta ne’e.

Notísia relevante: Governu kontinua renova Serka Sanitária iha Baucau no hakotu Viqueque

Tuir CCLN, regra prevensaun hosi Organizasaun Mundiál Saúde (OMS) no Ministériu Saude (MS) hanesan dalan di’ak uza atu sosializa ba povu hodi hatene transmisaun COVID-19 atu povu hatene no prevene-an no iha tempu hanesan loke espasu ba povu atu halo movimentu transporta produtu ba merkadu.

Nia dehan, bainhira movimentu normál ona presiza halo kolaborasaun serbisu ekipa entre parte seguransa hanesan Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), Sosiedade sivíl, Organizasaun Naun Govermentál (ONG), Saúde inklui Autoridade munisipál no lokal hodi kontrola situasaun.

“Ida-ne’e mak realiza ona, ha’u hanoin bele halo povu ne’e iha espransa moris fali,” Alari akresenta.

Veteranu ne’e konsidera implentasaun eskola online seidauk efetivu tamba povu laiha kbiit sosa telemóvel, nune’e bainhira atividade eskola laiha, bele fó impaktu ba estudante nia futuru.

“Hahán de’it kuaze laiha, sa tán sosa telemóvel, entaun ita halo desriminasaun boot no obriga, maibé laiha posibilidade atu sosa entaun iha uma de’it bele sai beik,” nia hatutan.

Tuir nia, solusaun ne’ebé di’ak husik povu livre, institusaun Governu, eskola inklui merkadu funsiona maka tenke kontrola, akonpanã ho sosializasaun ba suku, aldeia inklui povu sira hodi iha konsiénsia ba povu kona-ba prevensaun moras COVID-19.

Jornalista: Natalino Belo

Editor: Julia Chatarina 

HAKEREK NO HATÁN

Please enter your comment!
Please enter your name here