Seremónia isár bandeira iha Munisípiu Covalima, Imajen Tatoli/Dok

COVALIMA,  09 juñu 2021 (TATOLI)—Administrasaun Munisípiu Covalima (AMC) halo ona rekrutamentu ba funsionáriu kazuál ne’ebé atu hala’o servisu Administrasaun, Téknika Ambiental, Enjeñeira no  Téknika Saúde Ambientál.

Notísia Relevante : Feto okupa kargu xefia iha Covalima sei menus

Funsionáriu kazuál katak mak funsionáriu-sira ne’ebé kontrata iha tempu balun (kontratu termu sertu) atu fó apoiu ba servisu temporáriu nian. Bainhira kontratu termina, bele  hapara no bele mós halo estensaun servisu depende ba nesesidade no finansiamentu.

Prosesu rekrutamentu ne’ebé lidera hoi Jacinto dos Santos, nu’udar prezidente juri, liu ona faze selesaun dokumentu. Nune’e, kuarta ne’e, hahú teste eskrita ba kandidatu sira ne’ebé liu ona selesaun dokumentu.

“Ohin ami halo teste eskrita ba kandidatu funsionáriu  kazuál ne’ebé atu hala’o servisu iha área administrasaun, téknika ambientál, enjeñaria no téknika saúde ambientál,” Jacinto dos Santos, informa ba Agência Tatoli iha Salaun  Administrasaun Munisípiu Covalima.

Kandidatu ne’ebé konkorre iha vaga ne’e hamutuk na’in-351 hosi númeru ne’e  kandidatu 200 maka liu (aprovado) iha selesaun dokumentu  no na’in-150  la liu (reprovado).

Ba sira-nain 200 ne’ebé tuir teste eskrita ne’e hadau oportunidade vaga 15 ne’ebé AMC presiza no tuir nesesidade AMC nian iha faze ida-ne’e.

Jornalista       : Celestina Teles 

Editór             : Francisco Simões 

HAKEREK NO HATÁN

Please enter your comment!
Please enter your name here