Edifísiu CAC. Imajen/Média CAC.

DILI, 08 juñu 2021 (TATOLI)—Uniaun Europeia (UE) ho Programa Nasaun Unida ba Dezenvolvimentu (PNUD), fó apoiu ekipamentu informátika ba Komisaun Anti Korrupsaun (CAC sígla portugés).

Ekipamentu informátika  hirak-ne’e mak hanesan, labtop hamutuk 22, multi-port adaptors 22,  screens haat  no  Uninterruptible Power Supply (UPS) rua hamutuk ho pakote microsoft office, ne’ebé sei uza ba instituisaun ne’e atu estabelese solusaun foun Information Technology (IT), hodi fasilita serbisu-sira ho di’ak liu-tán.

Notísia relevante:Janeiru-marsu, CAC investiga kazu 30

“Ekipamentu informátika hirak-ne’e hodi reforsa kapasidade dijitál instituisaun, liu-liu iha tempu ne’ebé funsionáriu barak tenke serbisu dook hosi uma,’’ komunikadu ne’ebé Tatoli asesu, haktuir.

Komunikadu ne’e subliña, inisiativa ne’e halo parte ba dezenvolvimentu kapasidade institusionál no resposta ba COVID-19 iha projetu Pro-PALOP ho objetivu hametin governasaun efetiva hosi nasaun-sira ne’ebé ko’alia lian portugés iha Áfrika no Timor-Leste, ho kuadru lejizlativa hanesan.

CAC konsidera projetu ne’e tulun tebes atu dezenvolve estratejia Anti-korrupsaun no kampaña divulgasaun hodi prevene korrupsaun, ho apoiu hosi ekipamentu informátika.

CAC nu’udár instituisaun foun ida iha Timor-Leste ne’ebé estabelese iha 2010 ho papél atu monitoriza rekursu Estadu.

Alende instituisaun supervizaun-sira seluk, papél CAC iha prevensaun no kombate korrupsaun, subliña ona dezde aprovasaun Lei Anti Korrupsaun iha 2020, nune’e, apoiu ekipamentu hirak-ne’e konsidera tuir tempu no relevante tebes ba CAC.

Apoiu ekipamentu informátika ba CAC hanesan parte ida hosi programa ba konsolidasaun governasaun ekonómika no sistema jestaun finansa públika iha PALOP-TL – Fase II, hetan finansiamentu hosi Uniaun Europeia no PNUD.

Antes ne’e, PNUD iha Timor-Leste suporta ona CAC hanesan treinamentu ba forsa traballu no mós foin lalais fó apoiu foka liu ba aspetu prevensaun, hanesan dezenvolve manuál avaliasaun diagnóstiku no formasaun anti-korrupsaun inklui hala’o kampaña divulgasaun ba funsionáriu públiku no públiku.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here