Edifísiu Sentru Saúde Maliana. Imajen Tatoli/Sérgio da Cruz.

BOBONARO, 08 juñu 2021 (TATOLI)—Hahú hosi janeiru to’o maiu, Sentru Saúde Maliana, rejista kazu Infesaun Respiratória Agudu (IRA sígla portugés), hamutuk 4.183, tuir kedan diareia hamutuk 797.

Hosi númeru IRA ne’ebé rejistadu, mensalmente klasifika hahú hosi janeiru rejista ema 602 kompostu hosi feto 384 no mane 218, fevereiru 568 iha feto 322 no mane 246, marsu 552 iha feto 322 no mane 230, abril 746 iha feto 345 no mane 401 no maiu 719 iha feto 358 no mane 369.

Notísia relevante:Ospitál referál Maliana mantein implementa programa vizilánsia sentinela

Diretór Sentru Saúde Maliana, Luís Gonçalves, esplika IRA mak rejistadu aas tanba kauza hosi klíma rai-rahun ne’ebé halo ema susar atu dada-iis.

“Agora tempu bailoron, rai-rahun makaas, dalaruma komunidade balun halo atividade hotu-hotu sempre hasoru rai-rahun,” Luís Gonçalves  hateten ba jornalista Agência Tatoli iha Sentru Saúde Maliana  Ritabou, tersa ne’e.

Luís Gonçalves husu ba Komunidade atu bainhra ba fatin ruma tenke uza máskara no rega beibeik uma-oin atu prevene aan hosi moras IRA.

Kona-bá atendimentu hosi pesoál saúde ba pasiente iha fatin ne’e, nia dehan, sempre kumpre protokolu Organizasaun Mundiál Saúde (OMS) no mós Ministériu Saúde (MS).

Sentru Saúde ne’e enfrenta difikuldade kona-bá apoiu serbisu administrasaun inklui atividade barak labele realiza, tanba Bobonaro implementa hela serka sanitária.

Totál funsionáriu iha Sentru Saúde Maliana hamutuk 30, no hosi númeru ne’e iha na’in 11 mak kontratadu ba apoiu prevensaun COVID-19.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here