Formasaun online ho jornalista kona-ba meiu ambiente no risku dezastre naturál, iha Suai Room, Timor Plaza, tersa (08/06). ImajenTATOLI/Francisco Sony

DILI, 08 juñu 2021 (TATOLI)—Sekretaria Estadu Ambiente (SEA) hamutuk ho Sekretaria Estadu Protesaun Sivíl (SEPS), liuhosi projetu green light of funny, fasilita formasaun loron-ida via online ba jornalista sira, atu halo divulgasaun informasaun iha área meiu ambiente no risku dezastre naturál.

Diretór Jerál SEA, João Carlos Soares, konsidera formasaun ne’e importante tanba Timor-Leste tama kategoria nasaun sanulu ho risku ba dezastre naturál.

Diretór Jerál SEA, João Carlos. Imajen TATOLI/Francisco Sony

“Ita hakarak serbisu hamutuk iha projetu green light of funny, ho nune’e bele halo parseria ho jornalista sira hanesan fonte informasaun atubele habelar informasaun kona-ba ambiente no risku dezastre,” Diretór Jerál SEA informa iha Suai Room, Timor Plaza, tersa ne’e.

Durante ne’e, Diresaun Nasionál Meteorolojia no Jeofízika mak sempre divulga informasaun kona-ba klima atuál liuhosi rede sosiál, nune’e komunidade sira bele informadu liután.

 “Tuir loloos ita iha portál importante ida no iha televizaun hanesan iha Indonezia ka nasaun sira seluk ne’ebé bele fó sai previzaun tempu, entaun ita presiza halo liuhosi programa ida no halo kombinasaun atubele informa ba komunidade liu-liu jestór sira ba projetu sira,” nia akresenta.

Iha fatin hanesan, Sekrátariu Estadu Protesaun Sivíl (SEPS), Joaquim José Gusmão dos Reis Martins, hateten, formasaun ne’e hanesan parte ida atu fó informasaun ba jornalista sira atubele halo reportajen di’ak kona-ba mudansa klimátika kona-ba meiu ambiente no dezastre naturál.

Formasaun online ho jornalista kona-ba meiu ambiente no risku dezastre naturál, iha Suai Room, Timor Plaza, tersa (08/06). ImajenTATOLI/Francisco Sony

“Jornalista sira bele asesu informasaun kona-ba ambiente no mudansa klimátika ho di’ak no akuradu no ita bele dehan alerta sedu ba kestaun dezastre sira ne’ebé maka mosu, nune’e bele konsensializa komunidade sira prevene-an antes,” nia dehan.

Entretantu, programa green light of funny, finansia hosi United Nations Development Programme (UNDP) no partisipa hosi reprezentante Ministériu Adminstrasaun Estatál (MAE), Ministru Agrikultura no Peska (MAP), inklui jornalista sira.

Jorrnalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here