Kondisaun merkadu Maliana. Imajen Tatoli/Sérgio da Cruz.

BOBONARO, 8 juñu 2021 (TATOLI)—Implementasaun serka sanitária iha munisípiu Bobonaro durante loron 14, hahú hosi 01 to’o 15 juñu, atividade ekonomia iha merkadu Maliana paradu liuliu sasan la folin tanba laiha duni movimentu.

Espresaun hosi negosiante Santina Rica Mau Maia, katak, antes implementasaun serka sanitária loron ida faan modo bele hetan to’o $20, maibé agora kompradór menus liu no loron ida hetan de’it $5.

Notísia relevante:COVID-19: Bobonaro transfere pasiente grave ida ba Vera Cruz

“Agora ema la mai hola. Ami-nia modo balun dodok hotu,” Santina Rica Mau Maia, hateten ba Jornalista Agência Tatoli, iha merkadu Maliana, tersa ne’e.

Nune’e mós negosiante Faustino Ximenes ne’ebé faan ikan hateten, durante serka sanitária rendimentu laiha, tanba ne’e susar atu kontinua halo negósiu.

“Ami faan ikan ema la hola no osan mós hotu, ami atu buka moris susar,” nia hateten.

Maski nune’e, negosiante hirak-ne’e konsidera medida ne’ebé Governu foti ba prevensaun COVID-19 ne’e diak no espera katak, moras aat ne’e bele lakon lalais hosi rai ne’e, nune’e bele kontinua hatutan moris ho fila-liman.

Tuir observasaun jornalista Agência Tatoli, ekipa prevensaun no mitígasaun surtu COVID-19 Bobonaro kompostu hosi pesoál saúde, Polísia Nasionál Timor Leste (PNTL) ho FALINTIL Forsa Defeza Timor Leste (F-FDTL), kontinua hala’o sensibilizasaun ho karreta móvel iha komunidade nia leet inklui aviza liuhosi Rádiu Komunidade Maliana.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here