Pesoál saúde fó vasina ba abitante, iha sentru saúde iha Dili. Imajen TATOLI/António Gonçalves

DILI, 08 juñu 2021 (TATOLI)–Primeiru-Ministru (PM), Taur Matan Ruak, bolu eis Ministru Saúde (MS) no Médiku timor-oan senior, Sérgio Lobo, hodi rona opiniaun ligadu ho implementasaun vasina kombate COVID-19. 

“Ita agora iha faze halo programa vasina ba populasaun tomak, tanba ne’e ha’u mai hasoru Primeiru-Ministru hodi hato’o opiniaun, hosi médiku hotu la’os ha’u mesak de’it, kona-ba oinsá bele hetan aproveitamentu másimu hosi kampaña vasina ne’ebé ita halo tanba COVID-19,” Sérgio Lobo hateten hafoin hasoru Xefe Governu iha Rezidénsia Farol, tersa ne’e.

Notísia relevante: Vasina efetivu, númeru pozitivu COVID-19 hahú menus

Tuir Médiku ne’e, iha vantajen bainhira maioria populasaun simu ona vasina.

“Loos duni kuandu populasaun barak ka 70% simu ona vasina, maka ita bele dada iis di’ak ona tanba tama ona tinan rua ita terus tanba COVID-19 ne’e,” nia akresenta.

Nia mós konsidera vasina sai hanesan medida prevensaun di’ak kombate pandemia globál .

“Medida konstrutivu ne’ebé tenke implementa, tanba ho vasina ita bele iha imunidade no book-an di’ak liután, maski ita hetan COVID-19 maibé sei la ameasa ba ita-nia moris,” nia garante.

Sérgio Lobo nota mós katak durante ne’e evolusaun vasina la’o di’ak tebes tanba loron-loron iha ema barak mak hakarak vasina.

Tuir dadus, to’o iha segunda (07/06), ema ho idade 18 ba leten hamutuk 100.000 iha territóriu tomak mak simu vasina tipu AstraZeneca doze dahuluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here