Ministériu Saúde (MS), lansa estabelesimentu komisaun nasionál ba kontrola moras sira-ne'ebé hada'et, liu hosi vetór no kampaña ba kombate Dengue, iha otél Novo Turizmu, tersa (08/06/21). Imajen/Média MS.

DILI, 08 juñu 2021 (TATOLI)— Ministériu Saúde (MS), lansa estabelesimentu komisaun nasionál ba kontrola moras sira-ne’ebé hada’et, liu hosi vetór no kampaña ba kombate Dengue, iha otél Novo Turizmu, tersa ne’e.

“Objetivu enkontru ne’e atu haforsa komisaun tékniku ba implementasaun kontrola vetór no komisaun jestaun klínika ba dengue, hodi hala’o kampaña ba kombate dengue. Ita mós diskute termu referénsia no kompozisaun hosi komisaun ne’e. Espera komisaun ne’e bele hala’o nia knaar ho lalais,” Vise-Ministru Saúde, Bonifácio ‘Maucoli’ dos Reis, hateten iha diskursu.

Notísia relevante:Kombate dengue presija konsiénsia komún

Vise-Ministru ne’e hatutan, iha Timor-Leste dengue sai nu’udár problema saúde públika ne’ebé ninia kazu sempre mosu iha komunidade nia leet, liu-liu iha tempu udan ne’ebé favorese ba vetór ho nia prokriasaun iha tinan 2019 hamutuk 975 no 2020 iha 1.450 no fatalidade 0,7%.

Kazu ne’e, MS haree katak, disproporsionalmente afeta labarik ki’ik-sira entre idade ida to’o haat ho indise fatalidade maka 0.4 % no tinan lima to’o 14 nia indise fatalidade maka 0.2%.

Tuir dadus MS, kazu dengue ba dahuluk rejista iha Dili, Baucau, Bobonaro, Covalima, Liquiça no Manatuto.

Alende ne’e, kazu malária mós kada tinan sempre tun beibeik no programa malaria nasionál sei iha hela prosesu ba aplikasaun sertifikasaun livre malaria iha tinan ida tuir-mai.

Nia esplika tan katak, haree ba realidade implementasaun serbisu ba programa moras hada’et ne’ebé tranzmite hosi vetór mak hanesan dengue, malária, filariasis linfästiku, framboezia, lumbriga no seluk-tan.

Hosi ne’e, programa malária hatudu ona progresu ne’ebé signifikante no di’ak tebes kompara ho sira-seluk liu-liu dengue ne’ebé sei sai problema boot iha saúde públika no tinan-tinan iha aumentu kazu hodi rezulta ema mate.

Kona-bá dezenvolvimentu politika no estratejia ba kontrolu moras hada’et liuhosi vetór atu integra serbisu malária ba departamentu kontrola moras hada’et ne’ebé transmite hosi vetór, sai hanesan ajenda prioridade nasionál iha planu kuadru serbisu Ministériu Saúde.

“Nune’e mós apoiu orsamentu atu dezenvolve planu estratéjiku foun, hodi aloka iha planu orsamentu programa malária ne’ebé hetan apoiu hosi Fundu Globál ba periúdu 2021-2023,” Bonifácio Maucoli dos Reis, subliña.

Orsamentu ne’e mós inklui dezenvolvimentu planu rekursu umanus no halo kapasitasaun ba ofisiál ne’ebé sei integra ba departamentu kontrola moras hada’et ne’ebé transmiste hosi Vetór.

Ministériu Saúde agradese tebes ba kolaborasaun hosi Organizasaun Mundiál Saúde (OMS) iha TL, ajénsia, doadór-sira, parte interesadu-sira ne’ebé iha esforsu atu redús prevalénsia no insidénsia ba moras hada’et liuhosi vetór iha TL, nomós apoiu ba eventu lansamentu ida-ne e.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here