iklan

NASIONÁL, HEADLINE, KAPITÁL

MPO-MAE konklui planu realojamentu temporáriu vítima dezastre naturál

MPO-MAE konklui planu realojamentu temporáriu vítima dezastre naturál

Uma komunidade iha Bidau ne’ebé hetan estragu hosi inundasaun iha 04 abríl 2021. Imajen Tatoli/António Gonçalves.

DILI, 08 juñu 2021 (TATOLI)—Ministériu Planu Ordenamentu (MPO) no Ministériu Administrasaun Estatál (MAE) halo ona planu realojamentu temporáriu ba vítima dezastre naturál.

“Ami konklui ona planu harii uma atu halo realojamentu temporáriu ba vítima dezastre naturál no sei aprezenta iha reuniaun Konsellu Ministru atu aprova iha tempu badak, nune’e harii uma iha fatin balun ne’ebé propoin ona hosi Ministériu Justisa (MJ),” Ministru Administrasaun Estatál, Miguel Pereira de Carvalho, informa iha Rezidénsia Primeiru-Ministru, Farol, tersa ne’e.

Notísia relevante: MPO elabora medida ordenamentu territóriu ba prevensaun risku dezastre naturál

Nune’e, nia apela ba sidadaun hotu ne’ebé hela iha área risku dezastre naturál, atu labele filafali ba hela fatin.

“Governu aviza ona ba Xefe aldeia no Xefe suku sira atu kontrola vítima dezastre naturál sira, labele fila ba fatin risku tanba Governu agora buka hela solusaun,” nia akresenta.

Dadus ikus hatudu katak, família afetadu inundasaun iha loron 04 abríl, hamutuk 33.835 iha territóriu tomak no rejista ema mate hamutuk 44.

Enkuantu, tuir dadus provizóriu rejista família 7.246 desloka ba sentru akollimentu 31.

Tuir dadus hosi MAE, família hamutuk 2.558 maka daudaun hela iha área risku dezastre naturál iha munisípiu Dili, hanesan besik mota, foho-lolon no lagoa ninin.

Nune’e, Ministériu Justisa (MJ) liuhosi Diresaun Nasionál Teras no Propriedade (DNTP) identifika ona rai Estadu mamuk iha fatin tolu hanesan iha Hera ektare 20, Beduku ektare neen no Tibar ektare neen, atu halo realojamentu ba vítima dezastre naturál ne’ebé hela iha área risku.

Jornalista: Florêncio Miranda Ximenes

Editora: Julia Chatarina

iklan
iklan

Leave a Reply

iklan
error: Content is protected !!