Formasaun ba feto potensiál sira iha Munisípiu Viqueque, tersa (08/06). Imajen Tatoli/Vitorino Lopes da Costa

VIQUEQUE, 08 juñu 2021 (TATOLI)-Ekipa Ministériu Administrasaun Estatál (MAE) kolabora ho Sekretáriu Estadu Igualdade no Inkluzaun (SEII), tersa ne’e, iha Viqueque, oferese formasaun kona-bá Analiza Orsamentu Asaun Anuál (PAA) tinan 2022 ba feto potensiál-sira iha Munisípiu Viqueque nian.

Notísia Relevante : SEII kontinua promove feto partisipa iha setór oioin

Diretór Jerál Administrasaun Finansa, Ministériu Administrasaun Estatál (DJAF-MAE), Agustinho da Costa, hateten  formasaun ne’e planu asaun anuál MAE ne’ebé indika ona iha programa estratéjika abordajen integradu jéneru.

Programa ne’e implementa ona Munisípiu Lautém, Baucau no agora alastra ba Munisípiu Viqueque, atu fó kapasitasaun ba feto potensiál-sira no ba oin nafatin reforsa área formasaun ba feto hasa’e nia abilidade no kapasidade hodi partisipa ativu iha dezenvolvimentu Timor-Leste.

Agustinho da Costa esklarese katak, formasaun ne’e nia alvu maka atu garante implementasaun estratéjia abordajen integradu jéneru ho efetivu no efikásia liután ba lei, polítika, programa no orsamentu estadu ne’ebé aborda liuhosi instituisaun Estadu sira hanesan ministériu, sekretáriu estadu, autoridade munisipál no administrasaun munisipál sira hotu.

Sekretária Estadu Igualdade no Inkluzaun (SEII) hamosu Rezolusaun Governu númeru 35/2017 kona-bá mekanizmu estabelesimentu Grupu Traballu Jéneru Nasionál (Ministeriál) no Grupu Traballu Jéneru Munisipál ho objetivu garante implementasaun asuntu Igualdade no Inkluzaun iha nivel Nasionál no Munisipál la’o ho efetivu no sustentavel no aprezentasaun Orsamentu Sensivel ba Jéneru (OSJ).

Iha abertura formasaun ne’e, Administradór Munisípiu Viqueque, Januario Soares ‘Bolly’ hateten, formasaun ne’e importante tanba iha sosiedade eziste  feto no mane.

“Ita ko’alia libertasaun ne’e ba feto no mane hotu, bainhira parte ida mak la liberta ne’e ha’u hanoin susar. Tanba ne’e ita presiza haree mós jéneru nian, liuhosi formasaun atu hasa’e koñesimentu feto sira-nian hodi partisipa iha dezenvolvimentu,” Januario hateten.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here