Diretór Jerál Administrasaun Finansa, Ministériu Administrasaun Estatál (DJAF-MAE), Agustinho da Costa, aprezenta no partilla informasaun planu 2022 kona-bá delegasaun kompeténsia ba Administradór Munisípiu Viqueque, tersa (08/06). Imajen Tatoli/Vitorino Lopes da Costa

VIQUEQUE, 08 juñu 2021 (TATOLI)- Diretór Jerál Administrasaun Finansa, Ministériu Administrasaun Estatál (DJAF-MAE), Agustinho da Costa, tersa ne’e, aprezenta no partilla informasaun planu 2022 kona-bá delegasaun kompeténsia ba Administradór Munisípiu Viqueque, Januario Soares ‘Bolly’.

“Ha’u koordena ho administradór munisipiu hodi partilla informasaun kona-bá planu asaun anuál 2022 liga ba delegasaun kompeténsia ne’ebé distribui ona munisípiu 12,” Agustinho da Costa, informa  ba Agência Tatoli hafoin hasoru-malu ho Administradór Munisípiu Viqueque, Januario Soares ‘Bolly’ iha salaun administrasaun Munisípiu Viqueque.

Agostinho esplika, kompeténsia bazeia dekretu lei númeru 3/2016 delegasaun kompeténsia ba munisípiu, maibé kompeténsia sira seidauk implementa iha munisípiu tanba nia orsamentu  sei sentraliza iha MAE.

Delegasaun kompeténsia ba Munisípiu Viqueque foin iha kategoria merenda eskolár. Maibé iha rekizitu ba oin Governu sentrál no munisípiu mak rekursu umanu ne’ebé sufisiente hodi aplika ba dezempeñu servisu ba kompeténsia ne’ebé delega husi Governu sentrál.

Sorumutuk ne’e atu fahe informasaun kona-ba prosesu elaborasaun planu asaun anuál ba prienxe formatu hodi bele mellora di’ak liután prosesu elaborasaun iha futuru.

Tuir kuadru legal sira liuhosi dekretu lei númeru 11/2019, 14/05 no altera ba Dekretu-Lei númeru 53/2020, outubru, kona-ba orgánika MAE, Dekretu-Lei númeru 3/2016, 6/3 altera ba Dekretu-Lei númeru 9/2018, marsu; altera ba Dekretu-Lei númeru 54/28 outubru, kona-ba Estatutu Administrasaun Munisipál, Autoridade Munisipál no grupu tékniku interministeriál ba desentralizasaun Administrativa no mós rezolusaun Governu númeru 11/2019, 13/03; kona-ba ezekusaun desentralizasaun Administrativa no instalasaun órgaun reprezentativu podér lokál.

Planu prioridade ba elaborasaun implementasaun PEDN 2011-2030 liga PDIM 2019-2023 ho pre 2020-2021, planu dezenvolvimentu Munisipál ho pilár haat (4) mak hanesan;

  1. Dezenvolvimentu Kapitál Sosiál
  2. Dezenvolvimentu Infraestrutura
  3. Dezenvolvimentu Ekonomia
  4. Dezenvolvimentu Institusionál

Iha fatin hanesan Administradór Munisípiu Viqueque, Januario Soares ‘Bolly’ esplika delegasaun kompeténsia delega ona mai munisípiu, maibé orsamentu mak sei sentraliza iha Governu sentrál.

 “Ha’u sempre dehan laiha ema ida moris mai buat hotu kompletu, implementa took mak ita haree karik iha sala ruma mak ita husu ba Governu sentrál hodi fó asesoria no kapasitasaun hodi hala’o kna’ar ho di’ak,” Januario hateten.

Kona-bá rekursu umanu, Januario Soares ‘Bolly’ hateten, rekursu umanu iha Munisípiu Viqueque seidauk sufisiente tanba iha ona planu 2022 sei iha rekrutamentu ba pozisaun sira ne’ebé sei mamuk.

“Espera katak ha’u-nia proposta ba rekrutamentu ne’e bele simu iha nasionál hodi hetan aprovasaun,” nia hateten.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here