Igreja Evanjélika Asembleia de Deus iha Villa verde, DIli. Imajen/FB

DILI, 08 juñu 2021 (TATOLI)–Prezidente Konvensaun Nasionál Igreja Evanjélika Asembleia de Deus iha Timor-Leste, Pastor Francisco Reis, hasoru malu ho Primeiru-Ministru (PM), Taur Matan Ruak, hodi ko’alia kona-ba implementasaun serka sanitária no konfinamentu domisiliáriu liga ho atividade relijioza.

“Hosi ami-nia parte kuandu moras ne’e kontinua sa’e maka’as, ami sei la hein Governu atu hasai desizaun maibé automátikamente ami hapara atividade igreja tanba ami hakarak kuidadu povu no bainhira infesaun menus maka bele husik populasaun livre hodi buka moris ajuda ekonomia família,” Pastor Francisco Reis, hateten hafoin hasoru Xefe Governu iha Rezidénsia Farol, tersa ne’e.

Notísia relevante: Governu deside reativa atividade relijioza iha Dili maibé mantein distánsia

Biban ne’e, líder relijiozu ne’e agradese ba Governu tanba maski iha períodu serka sanitária no konfinamentu obrigatóriu iha Dili, maibé nafatin fó flesibidade ba sidadaun hodi hala’o ativudade esensiál sira.

“Agradese ba desizaun Governu tanba durante implementa konfinamentu obrigatóriu maibé sempre fó flesibilidade ba populasaun hala’o atividade ekonómika tanba haree ekonomia povu kiik susar tebes,” nia akresenta.

Tuir Pastor Francisco Reis, Timor-Leste maski hasoru situasaun COVID-19, maibé ho kondisaun ladún grave liu, kompara ho nasaun seluk.

Iha enkontru ne’e, Prezidente Igreja Evanjélika Asembleia de Deus, fó ideia balun ba Governu katak kuandu kontájiu COVID-19 mak evolui maka’as, bele implementa hikas regra ho rigór.

Iha segunda (07/06), Sala Situasaun, Sentru Integradu Jestaun Krize (CIGC, sigla portugés) rejista kazu pozitivu 24, rekuperadu 194 no kazu ativu 2.232, ne’ebé kazu hosi kazu foun 24, kompostu hosi Dili 20 no haat hosi munisípiu seluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here