Membru PNTL hala’o patullamentu tama-sai bairru iha Dili, hodi asegura komunidade iha situasaun serka sanitária, kuarta (12/05/21). Imajen Tatoli/António Gonçalves.

DILI, 08 juñu 2021 (TATOLI)—Polísia Nasionál Timor Leste (PNTL), liu hosi Komandante Jerál, Komisáriu Polísia, Faustino da Costa, alerta ba membru sira atu kuidadu utiliza arma Estadu, bainhira hala’o serbisu.

Komisáriu Faustino da Costa, alerta tanba regulamentu disiplinár PNTL deklara klaru katak, kualkér membru polísia fora hosi oras serbisu labele lori arma ba fatin públiku, hanesan festa no hala’o atividade privadu ne’ebé bele hamosu problema.

Notísia relevante:Kazu Lahane, arguidu tama prizaun preventiva

“Regulamentu PNTL mós sita klaru katak, bainhira membru ida uza arma arbiru, hanesan tiru kanek no hamate ema, sei prosesa tuir regulamentu dixplinár PNTL no sei simu konsekuénsia demisaun,” Faustino da Costa, hateten ba jornalista-sira iha rezidénsia Primeiru Ministru, Faról, tersa ne’e.  

Iha juñu 2020, Komandu PNTL Konsellu Superiór halo demisaun ba membru na’in-ualu (8) ne’ebé komete krime grave no ekipa Seksaun Justisa PNTL halo investigasaun kle’an indentifika halo violasaun ba lei no regra dixiplinár PNTL.

Sira-ne’ebé hetan demisaun kompostu hosi memnru polisia na’in-rua tiru mate joven na’in-tolu iha Kuluhun, iha tinan 2019 no kazu membru polísia JAS ne’ebé tiru kanek joven Isaac dos Santos iha área Lebukoe, aldeia Delesivati, suku Vivaquini, postu administrativu Maubara, Liquiça, iha 30 abríl 2020 no membru balun envolve iha kazu 14 maiu 2014, kona-bá tranferese mina hosi karreta kompañia ba fali karreta seluk.

Alende ne’e, Komandu PNTL mós prosesa kazu membru 324 ne’ebé komete irregularidade hodi fó suspensaun no halo mudansa ba sira-nia serbisu hosi munisípiu ida ba munisípiu seluk.

Dadus ne’e relata hosi Departamentu Justisa PNTL, ne’ebé rejista hosi 2018 to’o 2019, membru hirak-ne’e komete kazu Violasaun Direitu Umanu, ne’ebé sita mós hosi relatóriu Provedoria Direitu Humanu no Justisa (PDHJ).

Komandu PNTL kontinua implementa regulamentu, bazeia ba lei ne’ebé vigora, inklui regulamentu dixiplinár PNTL dekreitu Lei númeru/13/2004, 16 juñu.

Kritériu dixiplina maka, membru hotu-hotu tenki hatene no halo-tuir saida mak estipula iha regulamentu dixiplinár PNTL artigu 8 kona-bá devér jerál no devér espesífiku ne’ebé artikuladu iha regulamentu ne’e rasik.

Prosesu hosi implementasaun regulamentu dixiplinár mak agora membru-sira mós hetan formasaun étika polisiál ho importánsia oinsá promove PNTL ho étika ne’ebé aas, tuir dever sia (9) iha regulamentu dixiplinár hanesan, Devér Korresaun, Devér Zelu, Devér Izensaun, Devér Obediénsia, Devér Lealidade, Devér Sijíliu, Devér Asiduidadu, Devér Pontualidade no Devér Apromo.

Entretantu, ohin, Tribunál Distritál Dili (TDD), liu hosi desizaun primeiru interrogatóriu, aplika prizaun preventiva ba arguidu MJ nu’udár ajente PNTL, ne’ebé envolve iha kazu tiru mate sidadaun na’in-rua no ida kanek iha aldeia Ainitas-hun, suku Lahane Osidentál, postu administrativu Vera Crus, munisípiu Dili, sábadu (05/06).

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here