Ministru Justisa, Manuel Cárceres da Costa. Imajen/Egas Cristóvão

DILI, 08 juñu 2021 (TATOLI)—Ministru Justisa (MJ), Manuel Cárceres da Costa ho Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hala’o diskusaun kona-bá aplikasaun prinsípiu resiprosidade ho embaixada-sira iha Timor-Leste (TL).

“Ita hakarak hahú husu resiprosidade ho ita-nia nasaun amigu-sira ne’ebé sira-nia embaixada iha TL kona-bá arendamentu fatin, oinsá bele iha tratamentu hanesan ho ita-nia embaixada-sira iha liur,’’ Manuel Cáceres da Costa, hateten ba jornalista Agéncia Tatoli, iha kna’ar fatin Caicoli, hafoin hala’o diskusaun, tersa ne’e.

Notísia relevante:MNEK loke dalan ba diplomasia ekonomia

Governante ne’e hatutan, nasaun amigu-sira ne’ebé ninia embaixada iha TL, Governu rasik fasilita arendamentu uma Estadu ba sira, maibé embaixada TL nian iha liur, ida-idak buka rasik fatin.

“Tanba ne’e iha ona hanoin katak, ita aplika prinsípiu resiprosidade hodi nune’e ita husu tratamentu hanesan iha sira-nia rain,’’ nia hateten.

Nune’e mós MNEK, Adaljiza Albertina Xavier Reis Magno, hateten Governu mós halo hela diskusaun ho embaixada Estadus Unidus Amerika (EUA), bainhira parte rua iha konkordánsia ba proposta ne’ebé iha, bele hahú ona akordu resiprosidade.

Ida ne’e siginifika, bainhira iha ona planu resiprosidade, EUA bele fasilita mós fatin ba embaixada Timor-Leste nian iha Washington no Nova Iorke.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here