Gabinete de Apoio Sociedade Civíl entrega akordu subvensaun públika ba (APSCTL) imajen/Espesiál

DILI, 08 juñu 2021 (TATOLI)-Gabinete de Apoio Sociedade Civil (GASC), tersa ne’e, entrega nota akordu subvensaun públika hosi Governu Timor-Leste ba Organizasaun Asia Pacific Support Collective Timor-Leste (APSCTL) atu hala’o programa sensibilizasaun feto, pás no seguransa tuir Rezolusaun Konsellu Seguransa Nasoins Unidas 1325, loron 31 outubru 2000.

Koordenadór GASC, Filipe da Costa, hateten objetivu hosi akordu subvensaun ne’e hodi reafirma importante papél feto-sira iha prevensaun no rezolusaun konflitu sira, kria pás no estabilidade, no mós medida-sira atu proteje feto sira hosi violénsia bazeia ba jéneru.

“Atividade ne’e kapás tebes hodi envolve feto sira iha eskola, autoridade lokál, ajente parokiál, nune’e sira-nia proposta hetan aprovasaun ho valór orsamentu $20.000,00. GASC kontente maski ita-nia nasaun enfrenta krize oioin liu-liu pandemia COVID-19, maibé, APSCTL kontinua esforsu hodi hala’o sira-nia knaar hodi kontinua programa Governu ba sosiedade-ida pás, estabilidade no trankuilu iha sosiedade-nia laran,” Filipe da Costa, hateten liuhosi komunikadu imprensa ne’ebé Agência Tatoli asesu, tersa ne’e.

Koordenadór GASC, Filipe da Costa reafirma katak hosi orsamentu $20.000 ne’e sei transfere dahuluk ho valór orsamentu 40% ka montante $8.000.00 hodi hala’o atividade APSCTL nian, no transferénsia 60% sei tuirmai bainhira gabinete hetan ona relatóriu ezekusaun 40% nian.

“Tanba ne’e nia apela ba APSCTL atu kumpre akordu ba implementasaun programa ne’e hodi benefísiu ba ita-nia estudante, juventude, ajente parokiál no autoridade lokál sira, hodi kria pás no estabilidade, no mós medida-sira atu proteje feto sira hosi violénsia bazeia ba jéneru,” nia hateten.

Iha nota entrega termu ne’e Diretora Ezekutiva, Asia Pacific Support Collective Timor-Leste (APSCTL), Isabel Maria Marçal Sequeira hateten, sira hetan subvensaun públika hosi Fundu Gabinete de Apoio Sociedade Civil ho montante $20.000 hodi finansia ba programa empoderamentu feto nu’udar ajente transformasaun sosiál iha família no komunidade.

“Subvensaun ne’e atu finansia ba programa formasaun no sensibilizasaun kona-bá feto, pás no seguransa tuir Rezolusaun Seguransa Nasoins Unidas 1325 liuhosi atividade koordenasaun, konsultasaun ho autoridade lokál,” Isabel Maria Marçal Sequeira hateten.

Isabel dehan objetivu no rezultadu prinsipál husi subvensaun ne’e mak atu eleva koñesimentu feto-sira liga ba rezolusaun ONU 1325 kona-bá papél feto-sira ba prevensaun, no rezolusaun konflitu no envolvimentu ba promosaun pás no seguransa iha sira-nia komunidade ka eskola, muda mentalidade, no atitude kona-bá evita diskriminasaun no marjinalizasaun ba feto sira iha komunidade no eskola, no hasa’e konxiénsia komunidade, autoridade lokál juventude hodi prevene violénsia.

Tuir akordu, APSCTL sei implementa sira-nia atividade iha Postu Administrativu Cristo-Rei, Metinaro no Nain Feto, Munisípiu Dili.

Jornalista : Arminda Fonseca

 Editór      : Francisco Simões

HAKEREK NO HATÁN

Please enter your comment!
Please enter your name here