Adjuntu Diretór Eskola Ensinu Sekundariu Públiku nú. 2, Villa nova Baucau, Titus Almeida. Imajen TATOLI/Natalino Belo

BAUCAU, 08 juñu 2021 (TATOLI)—Adjuntu Diretór Eskola Ensinu Sekundáriu Públiku (ESP) númeru 2, munisípiu Baucau, Titus Almeida, hateten, profesór sira distribui matéria rezumu ba estudante sira tanba konsidera implementasaun eskola online ladún efetivu.

“Bazeia ba enkontru, maioria Diretór Eskola iha munisípiu Baucau deside halo rezumu matéria do que aplika eskola online tanba daudaun ita haree populasaun iha fatin barak seidauk asesu ba eletrisidade no laiha kbiit naton atu sosa telemóvel no pulsa,” Adjuntu Diretór Eskola informa ba Agência TATOLI, iha ninia knaar fatin, Villa nova, Baucau, tersa ne’e.

Notísia relevante: MEJD lansa programa eskola ba uma no tele-eskola

Tuir nia, inan-aman balun hosi alunu maioria mak labele partisipa iha eskola online tanba laiha kbiit.

“Eskola online ne’e la fó benefísiu no ita halo diskriminasaun ba estudante sira,” nia akresenta.

Reprezentante eskola ne’e haktuir, hosi númeru estudante ne’ebé iha, 50% mak halo konsultasaun matéria liuhosi meiu rede sosiál, enkuantu seluk kuaze asesu direta ba profesór sira.

“Difikuldade seluk ne’ebé estudante no profesór sira hasoru mak liña elektrisidade mate-lakan no rede internet lentu iha Baucau,” nia hatutan.

Nune’e, nia konsidera, solusaun ne’ebé fasil mak distribui matéria hodi ajusta ho ezersísiu ba estudante sira no halo konsultasaun direta no indireta entre estudante ho profesór.

Adjuntu hato’o mós rekomendasaun ba ministériu relevante, atu disponibiliza 3° ano hasoru direta profesór sira hodi prepara ezame nasionál.

Nune’e mós, aselera vasinasaun hodi reativa hikas aktividade aprendizaje no iha tempu hanesan kumpre nafatin regra hosi Organizasaun Mundiál Saúde (OMS) no Ministériu Saúde (MS).

Entertantu, ESP númeru 2 Villa nova, Baucau iha klase paralelu Uailili no tuir dadus, totál estudante hamutuk 1.087, kompostu hosi ESP númeru 2 hamutuk 1.005 no klase paralelu Uailili ho estudante 82.

Jornalista: Natalino Belo

Editor: Julia Chatarina

HAKEREK NO HATÁN

Please enter your comment!
Please enter your name here