Membru Asembleia Konsellu Koordenasaun Munisipál Baucau halo votasaun ba ajenda diskusaun ne'ebé realiza iha CCB, Villa antiga Baucau, tersa (08/06). Imajen TATOLI/Natalino Belo

BAUCAU, 08 juñu 2021 (TATOLI)—Prezidente Autoridade Munisípiu (PAM) Baucau, Olívio ‘Bou lesa’ Freitas, hateten, reuniaun Konsellu Koordenasaun Munisipál (KKM) liuhosi votasaun, aprova ona pareser Konsellu Konstrutivu Munisípál, hodi reativa hikas atividade aprendizajen iha munisípiu Baucau.

“Iha pareser Konsellu Konstrutivu Munisipál, aprova reativa atividade eskolár iha munisípiu Baucau,” PAM Baucau informa iha Sentru Konvensaun Baucau (CCB, sigla portugés), Villa antiga Baucau, tersa ne’e.

Notísia relevante: Reuniaun Konsellu Konstrutivu munisípiu Baucau diskute ajenda importante haat

Biban hanesan, membru KKM aprova mós pareser seluk hanesan mudansa pontu entrada iha Triloka bá fronteira postu administrativu Vemasse no Laleia, Manatuto, prepara fatin kuarentena iha Baucau bainhira realiza teste swab, konstrusaun sentru formasaun juventude Baucau integra ba projetu Planu Dezenvolvementu Intergradu Munisipál (PDIM) no planu dezenvolvementu sosiu-ekonómiku 2022.

Membru sira halo mós deliberasaun ba ajenda importante seluk hanesan relatóriu ezekusaun orsamentál 2021 hosi autoridade munisipál Baucau hahú janeiru to’o maiu, proposta planu asaun annuál tinan 2022, planu asaun annuál abordajen intergradu jéneru, PDIM tinan 2022 no proposta projetu Programa Nasional Dezenvolvementu Suku (PNDS) tinan 2022.

“Ohin aprova liuhosi votasaun,” nia akresenta.

Reuniaun KKM rasik realiza bazeia ba artigu 22 to’o 31 dekretu-lei númeru 3/2020 no dekretu-lei númeru 4 artigu 41, 3/2006.

Tuir regulamentu, bainhira atu realiza reuniaun, membru sira tenke prenxe korum 1/3 hosi totál 57 membru.

Tuir observasaun jornalista iha terrenu, durante realiza Asembleia KKM, maioria membru partisipa másimu, kompostu hosi Autoridade postu na’in-neen hosi Baucau Villa, Baguia, Laga, Venilale, Quelicai no Vemasse, Xefe suku haat, Diretór institusaun públika munisipál sira, pontu vokál munisipál hamutuk 50 no lidera direta hosi PAM Baucau, Olívio ‘Bou lesa’ Freitas.

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here