Admistradór postu admistrativu Baguia, munisípiu Baucau, António Ramos. Imajen TATOLI/Natalino Belo

BAUCAU, 08 juñu 2021 (TATOLI)–Admistradór postu admistrativu Baguia, munisípiu Baucau, António Ramos, konsidera implementasaun serka sanitária fó impaktu ba ekonomia komunidade.

“Daudaun ne’e povu Baguia halerik, tamba ami iha postu admistrativu Baguia dook hosi munisípiu Baucau, liuliu iha área ekonomia ami-nia komunidade sira halerik tamba laiha transporte atu halo viajen hosi Baucau bá Baguia no Baguia mai Baucau,” Admistradór postu dehan ba Agência TATOLI, iha Sentru Konvensaun Baucau (CCB, sigla portugés), tersa ne’e.

Notísia relevante: Governu mantein impozisaun Serka Sanitária iha Baucau, Covalima no Dili

Tuir nia, maski distribuisaun Cesta Bázika implementa ona iha postu ne’e, maibé seidauk bele rezolve ekonomia tamba povu nafatin halerik ba nesesidade bazika.

Aleinde ne’e, António Ramos konsidera, atividade eskolár ne’ebé parradu, fó impaktu ba estudante iha Baguia tanba haluha ona matéria eskola.

“Ami-nia oan (estudante) sira haluha hotu matéria ne’ebé mestre sira fó no aktividade Governu no ami autoridade lokál ladún iha,” nia akresenta.

Entertantu, daudaun ne’e munisípiu Baucau implementa hela serka sanitaria to’o 15 juñu relasiona ho propagasaun surtu COVID-19.

Tuir dadus hosi Sala Situasaun, Sentru Intergradu Jestaun Krize (CIGC, sigla portugés), daudaun ne’e munisípiu Baucau iha kazu foun hamutuk rua, ativu hamutuk 229, rekupera 79 no kazu rejistadu hamutuk 308.

Jornalista: Natalino Belo

Editora: Julia Chatarina

HAKEREK NO HATÁN

Please enter your comment!
Please enter your name here