Koordenadór Gabinete Apoiu Sosiedade Sivíl (GASC-sigla), Filipe da Costa. Imajen/ Espesiál

DILI, 07 juñu 2021 (TATOLI)- Forum Organizasaun Naun Governamentál Timor-Leste (FONGTIL), segunda ne’e, hala’o workshop virtuál kona-bá Ekonomia Sosiál, Solidária no pratika-sira ba organizasaun sosiedade sivíl iha Timor laran tomak ne’ebé serbisu hamutuk ho Centro de Intervação Para o Desenvolvimento Amílcar Cabral (CIDAC) no Gabinete de Apoio à Sociedade Civil (GASC).

Notísia Relevante : COVID-19, FONGTIL husu sidadaun hotu koopera ho MS

Diretór Ezekutivu FONGTIL, Daniel do Carmo da Silva, esplika  FONGTIL hala’o workshop virtuál ne’e hodi promove konseitu ekonomia sosiál, solidária no pratika-sira ba organizasaun sosiedade sivíl membru FONGTIL nian, tanba durante ne’e, sosiedade sivíl iha Timor-Leste dependénsia ba asisténsia finanseira tantu Governu no parseiru dezenvolvimentu sira hodi implementa sira-nia programa iha Timor-Leste.

“Objetivu loloos husi workshop ne’e mak hodi reforsa organizasaun sosiedade sivíl-sira iha Timor-Leste atu membru-sira iha koñesimentu kona-bá konseitu no pratika ekonomia sosiál no solidária hosi nasaun seluk inklui Timor-oan, no membru-sira iha informasaun sira adekuadu hodi hala’o atividade alternativa hodi bele apoiu ba sira-nia atividade ekonomia lokál,” Daniel Santos do Carmo da Silva hateten liuhosi komunikadu imprensa ne’ebé Agência Tatoli asesu, segunda ne’e.

Koordenadór GASC, Filipe da Costa dehan, Governu liuhosi Gabinete Apoiu Sosiedade Sivíl serbisu hamutuk ho sosiedade sivíl-sira dezde  2008 to’o ohin loron, no kontribuisaun sosiedade sivíl-sira signifikante tebes hodi apoiu no implementa programa Governu.

Koordenadór GASC ne’e dehan, Governu konstitusionál dala-ualu nakloke tebes hodi sosiedade sivíl-sira bele serbisu hamutuk no hola parte, tau matan, foti nia papél, liu-liu durante tinan-ida nia-laran, Governu ho sosiedade sivíl sira esforsu atu hapara propagasaun COVID-19 liuhosi sosializasaun ba komunidade no hamate virus ne’e liuhosi kampaña programa vasinasaun AstraZeneca.

Nia dehan, Governu servisu hamutuk ho sosiedade sivíl ne’e hatudu katak kompromisu no serbisu hamutuk importante tebes no Governu nafatin rona opiniaun no krítika konstrutivu hosi sosiedade sivíl-sira no oinsá sosiedade sivíl garante konfiansa Governu ne’e hodi halo advokasia programa prioridade sira no apoiu Governu hodi buka solusaun di’ak ba problema nasionál.

“Iha ha’u-nia mandatu, ha’u sempre enkoraja no serbisu hamutuk ho sosiedade sivíl-sira hodi muda polítika/policy Governu nian tuir nesesidade no alvu povu nian. Tanba ne’e, GASC kria fundu-ida ba sosiedade sivíl atu sira bele ezekuta fundu ne’e tuir nesesidade, alvu no benefísiu ba povu,” Filipe da Costa hateten.

Nia husu ba partisipante-sira iha workshop ne’e aproveita didi’ak tanba sosiedade sivíl-sira hahú halo ona advokasia ba entidade Governu hodi define prioridade investimentu Governu nian iha Orsamentu Jerál Estadu 2022, tanba iha tempu badak Governu sei tama iha jornada kalendáriu orsamentál 2022 nian.

“Ha’u apresia tebes advokasia ne’ebé sosiedade sivíl-sira halo ona liuhosi diálogu ho Governu kada sesta-feira kona-bá kestaun problema nasionál. Diálogu ne’e importante tebes hodi sosiedade sivíl bele muda polítika investimentu Governu nian hodi atinje objetivu investimentu tuir nesesidade no alvu povu nian,” Filipe da Costa tenik.

Kona-bá implementa programa ho kustu no efeitu, Governu apoiu sosiedade sivíl liuhosi programa subvensaun públiku hodi apoiu implementa planu Governu kona-bá kreximentu ekonomia, kria empregu, no redús pobreza.

Koordenadór GASC, Filipe da Costa dehan subvensaun públiku no nia implementasaun hosi organizasaun sosiedade sivíl-sira tenke prodús rezultadu, benefísiu ka efeitu programa di’ak ba povu. Tanba ne’e mak sosiedade sivíl-sira aprende kle’an kona-bá konseitu ekonomia sosiál no solidária, no inisiativa rasik atu promove atividade ekonomia sosiál no solidária hodi sustenta sira-nia organizasaun iha futuru.

“Ha’u orgullu tebes FONGTIL hala’o workshop kona-bá promove konseitu ekonomia sosiál no solidária no pratika ba organizasaun sosiedade sivíl ne’ebé nia membru sira hahú atividade jeradora rendimentu (buka osan rasik),”  nia teten.

Koordenadór GASC dezafia ba sosiedade sivíl katak liutiha apreensaun kona-ba konseitu ne’e, sosiedade sivíl sira la dependénsia maka’as ba asisténsia finanseira tantu husi governu ka doadór sira hodi hala’o sira-nia atividade ne’ebé sei benefísiu ba povu.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here