Aeroportu Internasionál Rota do Sândalo, Oé-cusse. Imajen/Espesiál

DILI, 07 juñu 2021 (TATOLI)—Enjeñeiru no Supervizór empreza PT Wijaya Karya (Persero) Tbk (WIKA), Nur Wahid, hateten, hahú tinan 2010 to’o agora envolve ona iha projetu infraestrutura hosi Governu hamutuk 10 iha Timor-Leste.

“Governu fó fiar ona ami halo projetu hamutuk 10, hanesan sentrál elétrika Betano ho valór millaun $17, hahú ezekuta obra iha 01 outubru 2010 to’o 08 fevereiru 2012,” Enjeñeiru ne’e informa ba Agência TATOLI, iha Colmera, foin lalais ne’e.

Mega projetu ne’ebé WIKA hetan fiar hosi Governu Timor-Leste, iha tinan 2015, halo konstrusaun Aeroportu Internasionál Rota do Sândalo, iha Oé-cusse, ho valór projetu millaun $120, ne’ebé hahú iha loron 30 marsu 2015 no entrega obra iha dezembru 2019.

“Ida-ne’e orgullu ida ba ami, tanba Governu Timor-Leste fó fiar hodi halo mega projetu, ne’ebé antes ne’e Wijaya Karya halo konstrusaun Aeroportu Internasionál iha Bali inklui konstrusaun Aeroportu  Soekarno Hatta no Aeroportu ida iha Makassar. Tanba ne’e, Governu Timor-Leste fó fiar ami halo Aeroportu Oé-cusse no hetan apresiasaun hosi Governu rasik tanba tuir tempu ne’ebé determina ona,” nia akresenta.

Notísia relevante: Prezidente PN Konsidera Aeroportu “Rota do Sândalo” Exelente

Reprezentante empreza ne’e konvesa, difikuldade ne’ebé bain-bain hasoru maka pagamentu, maibé empreza nafatin koopera ho di’ak.

“Ami-nia difikuldade maka iha prosesu pagamentu, tanba ami halo projeitu tuir kontratu, maibé pagamentu sempre iha difikuldade tanba iha mudansa polítika. Tanba ne’e, ami husu polítiku sira iha Timor-Leste, bainhira partidu ida kaer ukun, ita tenke suporta malu nune’e dezenvolvimetu bele la’o, tanba ami iha ne’e ho objetivu ida atu kontribui ba dezenvolvimentu iha Timor-Leste,” nia subliña.

Nia garante, projetu sira ne’ebé maka Governu fó fiar hodi halo, empreza ne’e sei halo ramata tuir kontratu ne’ebé determina ona. 

Iha fatin hanesan, Supervizór PT Wijaya Karya (Persero) Tbk (WIKA), Tarmizi Ishak, hateten durante kaer projetu Governu, traballadór timor-oan ne’ebé envolve 50%.

“Iha ami-nia projetu, ami sempre fó oportunidade ba timor-oan hodi envolve iha obra sira ne’ebé WIKA halo iha Timor-Leste. Ami mós hanorin sira oinsá adapta teknolojia no serbisu tuir ida-idak ninia abilidade,” nia dehan.

Projeitu seluk ne’ebé empreza indonéziu ne’e toma konta mak estrada dirasaun Maliana bá Batugade, ne’ebé Governu kontrata ho millaun $4 no projetu ne’e hahú iha loron 30 agostu 2013 to’o 31 janeiru 2014.

Nune’e mós, WIKA hetan fiar hosi Governu Timor-Leste hodi halo ponte Comoro III ho valór kontratu  millaun $4,9 no projeitu ne’e rasik hahú ezekuta iha  loron 01 setembru 2012 to’o 31 abríl 2013.

Aleinde ne’e, projetu Zeti Hera, WIKA hetan fiar ho valór konstrusaun millaun $6 no projetu ne’e rasik hahú loron 24 novembru 2014 to’o 24 jullu 2015.

Iha mós projetu konstrusaun estrada Wai-Ono iha munisípiu Baucau ho valór konstrusaun millaun $1,7 no projeitu ne’e rasik hahú iha loron 10 jullu 2015 no termina iha  loron 28 dezembru 2017.

WIKA halo reabilitasaun  estrada iha munisípiu Manatuto, ho valór projetu millaun $3,9, ne’ebé projetu ne’e hahú iha loron 20 fevereiru 2017 to’o 19 juñu 2019.

Konstrusaun ponte ida iha Soibada ho metru 100, ho valór projetu millaun $3,2, hahú iha loron 20 fevereiru 2017 to’o 19 juñu 2019.

Ikus liu maka WIKA hetan kotratu hosi empreza lokál Esperansa Timor-oan (ETO) hodi konstrui ETO Tower ho andar 10, iha área Colmera.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here