Diretór Edukasaun Munisípiu Viqueque, Emidio Amaral. Imajen Tatoli/Vitorino Lopes da Costa

VIQUEQUE, 07 juñu 2021 (TATOLI)- Diretór Edukasaun Munisípiu Viqueque, Emidio Amaral, informa rede internet ne’ebé fornese hosi operadór telekomunikasaun-sira eziste iha Timor-Leste difikulta tebes estudante-sira iha Viqueque atu asesu aula online. Basá liña internet dala barak liu mosu-lakon no la’o neineik liu.

Notísia Relevante : MESSK halo sensibilizasaun padraun Ensinu Superiór

Nia hateten, implementasaun serka sanitária no  konfinamentu obrigatóriu ne’ebé aplika mós ba Munisípiu Viqueque tanba pandemia  COVID-19 obriga estudante-sira tenke hela de’it iha uma no partisipa ensinu aprendizajen liuhosi online. Maibé estudante balun de’it mak partisipa no balun la partisipa tanba rede internet ladi’ak no estudante ladún asesu ba Radio Televizaun Timor-Leste, Empreza Públiku (RTTL.EP).

“Ita haree didi’ak iha Munisípiu Viqueque ne’e estudante ne’ebé partisipa ba aula online 60% no 40 % sira la tuir tanba la uza telemovel ne’ebé di’ak (android), ita mós la bele obriga estudante sira no ita mós haree ba sira nian família nia ekonomia hotu,” Diretór Edukasaun Munisípiu Viqueque, Emidio Amaral haktuir ba Agência Tatoli iha salaun Administrasaun Munisipál Viqueque, segunda ne’e.

Emidio hatutan, implementasaun serka sanitária ba prevensaun COVID-19 iha Munisípiu Viqueque durante fulan tolu ona halo estudante ida-idak estuda de’it iha sira-nia uma, sira aprende mós liuhosi RTTL.EP tanba Ministériu Edukasaun Juventude no Desportu (MEJD) kria programa Eskola Ba Uma ne’ebé estudante asesu ida ne’e iha uma no mós diretór eskola sira rezumu matéria hodi fahe ba estudante sira hodi estuda.

Mekanizmu seluk ba aprendizajen nian kada eskola sira distribui livru ba estudante sira, estudante na’in-lima hetan livru ida tanba númeru kuantidade livru limitadu tebes atu fahe ba estudante sira hotu.

Dadus kazu COVID-19 iha Munisípiu Viqueque iha konfinamentu kuarentena 0, auto-kuarentena 63, pasa ona loron sanulu resin haat 675, kazu foun 0, kazu kumulativu 160, rekupera foun 0, rekuperadu kumulativu 129, mate foun 0, mate kumulativu 0 no kazu ativu 31.

Jornalista       : Vitorino Lopes da Costa

Editór             : Francisco Simões

 

HAKEREK NO HATÁN

Please enter your comment!
Please enter your name here